Շղթայական ավտովթար Երևանում․ բախվել են «Mercedes»-ը, 2 «Changan»-ներն ու «Գազել»-ը

Հոկտեմբերի 10-ին՝ ժամը 11։00-ի սահմաններում, շղթայական ավտովթար է տեղի ունեցել Երևանում՝ Դավիթ Բեկի փողոցում։

Ինչպես հայտնում է ֆոտոլրագրող Գագիկ Շամշյանը, բախվել են Երևանի բնակիչ 29-ամյա Վահե Դ․-ի վարած «Mercedes»-ը, Կոտայքի մարզի բնակիչ 31-ամյա Տիգրան Ղ․-ի վարած «Changan»-ը, Արցախի Հանրապետության քաղաքացի 40-ամյա Մկրտիչ Ք․-ի վարած բեռնատար «Գազելը» և Կոտայքի մարզի բնակիչ 45-ամյա Դավիթ Ա․-ի վարած մեկ այլ «Changan»։

Բախման հետևանքով «Mercedes»-ը մասամբ փակել է երթևեկելի գոտին։ Ըստ նախնական տեղեկությունների՝ վթարի հետևանքով տուժածներ չկան։

Դեպքի վայր են ժամանել ՀՀ ՆԳՆ ոստիկանության պարեկային ծառայության Երևան քաղաքի գնդի 3-րդ գումարտակի 1-ին վաշտի պարեկները։ Վարորդները ենթարկվել են սթափության փորձաքննության, բոլորը եղել են սթափ։

Դեպքի փաստով պարեկային ծառայությունում կազմվում են անհրաժեշտ փաստաթղթեր։