«Էնքա՜ն բան կարող է լինել, իրականության հետ պետք է առերեսվել»․ Առաքել Սրբազան

ՀՀ վարչապետի աշխատակազմի «Հանրային կապերի և տեղեկատվության կենտրոն» ՊՈԱԿ-ի կողմից հրապարակված «Հայաստանյայց Առաքելական Սուրբ Եկեղեցու փաստացի պետի և մի շարք բարձրաստիճան հոգևորականների գործունեության արդյունքում Եկեղեցում առաջացած ճգնաժամի և լուծման ուղիների մասին» զեկույցի 2-րդ բաժնի 2․1 կետում անդրադարձ է կատարվում ենթադրյալ կուսակրոնության ուխտը խախտելու վերաբերյալ մի շարք անձանց, որոնց թվում են նաև Նիկոլ Փաշինյանին սատարած և նրա կողմից Եկեղեցու՝ այսպես կոչված բարենորոգության օրակարգին միացած Կոտայքի թեմի առաջնորդ Առաքել արքեպիսկոպոս Քարամյանը։

24News-ը կապ է հաստատել Առաքել Սրբազանի հետ և հետաքրքրվել՝ արդյոք կարդացե՞լ է զեկույցը, որտեղ նշված է նաև իր անունը։

«Ես հեռախոսով որևէ էսպես բանի չեմ պատասխանում։ Ես հոգևոր մարդ եմ, իմ ծառայության մեջ եմ։ Ես աղոթում եմ, որ մեր ազգը, եկեղեցին միասնական լինի, հանուն մեր ժողովրդի», – ասաց Կոտայքի թեմի առաջնորդը։

Մեր ուղիղ հարցին, որ զեկույցում իր անունն է նշված, Առաքել արքեպիսկոպոս Քարամյանն ասաց․
«Էնքա՜ն բան կարող է լինել։ Չէ, ես լրիվ չեմ կարդացել զեկույցը։ Մենք, իհարկե, պատրաստ ենք իրականության հետ առերեսվել, էսքան բան կարող եմ ասել ուրիշ ոչինչ»։

Հիշեցնենք՝ Նիկոլ Փաշինյանի հանձնարարությամբ հրապարակվել է զեկույց, որում ներկայացված է «Հայաստանյայց Առաքելական Սուրբ Եկեղեցու փաստացի պետի և մի շարք բարձրաստիճան հոգևորականների գործունեության արդյունքում Եկեղեցում առաջացած ճգնաժամի և լուծման ուղիների մասին»։

Հրապարակված զեկույցը դատապարտել է Մայր Աթոռ Սուրբ Էջմիածինը։

«ՀՀ Կառավարության կողմից հրապարակված Հայաստանյայց Առաքելական Սուրբ Եկեղեցու մասին այսպես կոչված զեկույցն իր բովանդակության և ձևի մեջ հակասահմանադրական է, հակականոնական և անօրինական։
Պետական միջոցների մսխմամբ՝ սոցցանցերում և լրատվամիջոցներում հրապարակված մեղադրանքների ու հերյուրանքների հիման վրա շարադրված «զեկույցը» դրսևորումն է քաղաքական հաշվեհարդարի, քինախնդրության և Եկեղեցու ներքին կյանքին դատապարտելի միջամտության», – ասված է հաղորդագրության մեջ։