«Դա կոչվում է թշնամություն Հայաստանի հանդեպ». Արկադի Կարապետյանը՝ ՌԴ-ի կողմից Ադրբեջանին զենք վաճառելու մասին
«Պատերազմից հետո մենք ռուսական բանակի մոդել վերցրեցինք, հիմա կամաց-կամաց հրաժարվում են, ինչը ճիշտ է, որովհետև ռուսական սիստեմը շատ անարդյունավետ է»,- Հայելի ակումբում լրագրողների հետ հանդիպման ժամանակ նման տեսակետ հայտնեց Լեռնային Ղարաբաղի Հանրապետության ինքնապաշտպանական ուժերի առաջին հրամանատար Արկադի Կարապետյանը: Հարցին՝ ինչպե՞ս եք գնահատում այն, որ մեր ռազմավարական գործընկեր ՌԴ-ն շարունակում է Ադրբեջանին զենք վաճառել, Ա. Կարապետյանն այսպես պատասխանեց. «Դա կոչվում է թշնամություն մեր հանդեպ, ուրիշ էլ ի՞նչ կարող եմ ասել» : Ըստ նրա ՝ այդպիսով երկու պետություններն իրենց խնդիրներն են լուծում, իսկ Ռուսաստանի արածին այլ անուն չկա, քան դավաճանություն: Գնդապետը վրդովվեց. «Դավաճանություն է, թշնամություն. ինչ ուզում եք անունը դրեք, քանի որ դա ամեն ինչին համապատասխանում է: Ինչ պատճառաբանություն էլ բերեն, ասեն՝ բիզնես է կամ այլ բան, միևնույն է՝ արդարացում չէ: Հասարակ մահկանացու, թե պետությունների հարաբերություններ նույնն են: Եթե քո թշնամուն զենք են վաճառում, կարող եք փողոցում էլ հարցնել, մարդիկ շատ ավելի ուրիշ բառերով կբնութագրեն»: Պարոն Կարապետյանն օրինակ բերեց, թե Ռուսաստանի արածը Հայաստանի հանդեպ նույնն է, ինչ մի մարդու թշնամուն տանես դանակ տաս, որ նրան սպանի:
Հետևեք մեզ Viber-ում
