Ատոմակայանը պետք է փակվի.ԵՄ-ի պահանջն է

Եվրոպական արտաքին գործողությունների ծառայության, Արեւելյան գործընկերության երկկողմ հարաբերությունների ստորաբաժանման ղեկավարի տեղակալ Դիրկ Լորենցը լրագրողներին ասաց.«Ատոմակայանը հնարավորիս շուտ պետք է փակվի, քանի որ հնարավոր չէ այն բարելավել այնպես, որ համապատասխանի անվտանգության միջազգային պահանջներին: Միեւնույն ժամանակ հասկանում ենք, որ Հայաստանի համար կարեւոր է էներգետիկ անվտանգությունը եւ  հիմա աշխատում ենք այդ ուղղությամբ»: «Հայաստանի համար առաջնային է  անկախ դատական համակարգի ներդրումը եւ պայքարը կոռուպցիայի դեմ: Մենք այստեղ ենք, որպեսզի մեխանիզմներ մշակենք իրավիճակը բարելավելու համար»,հավելեց  ԵՄ պաշտոնյան: «Այսօրվա հանդիպումը շատ գործնական է լինելու, հստակ քայլեր են մշակվելու, որպեսզի Հայաստանի քաղաքացին շոշափելի արդյունք տեսնի էներգախնայողության, վերականգնվող  էներգետիկայի, ճանապարհային անվտանգության բարելավման ոլորտում», հավելեց   Դիրկ Լորենցը: Նշենք,որ Դիրկ Լորենցը եւ Եվրամիության այլ ներկայացուցիչներ այս օրերին Հայաստանում են՝  քննարկելու,  թե ինչպե՞ս են կյանքի կոչելու Հայաստանի և Եվրոպական միության միջև ստորագրված Համապարփակ և ընդլայնված գործընկերության համաձայնագրի դրույթները, մասնավորապես քննարկվելու են էներգետիկայի, տրանսպորտի, շրջակա միջավայրի, կլիմայի գործողության և քաղաքացիական պաշտպանության հարցերը: