ՄԱԿ-ի Անվտանգության խորհրդի անդամները համաձայնության չեն եկել գլխավոր քարտուղարի թեկնածուի հարցում

Միացյալ ազգերի կազմակերպության Անվտանգության խորհուրդն առայժմ ընդհանուր հայտարարի չի եկել կառույցի գլխավոր քարտուղարի թեկնածուի հարցում։ Այս մասին հայտնում է The New York Times-ը՝ վկայակոչելով դիվանագիտական աղբյուրներին։

 Դիվանագետները լրատվամիջոցին փոխանցել են, որ առայժմ հստակ առաջատար չի ուրվագծվում, քանի որ գլխավոր քարտուղարի պաշտոնի թեկնածուների ընտրության համար պատասխանատու Անվտանգության խորհրդի անդամները դեռևս չեն եկել համաձայնության։

Չիլիի նախկին նախագահ Միշել Բաչելետը սեպտեմբերի 20-ին հայտարարել էր ՄԱԿ-ի գլխավոր քարտուղարի պաշտոնի համար պայքարը դադարեցնելու մասին։

 Այդ հայտարարությունը հնչել էր ՄԱԿ-ում սեպտեմբերի 18-ին անցկացված խորհրդակցական հերթական քվեարկության արդյունքների հրապարակումից հետո։ Ըստ այդմ՝ ՄԱԿ-ի գլխավոր քարտուղարի պաշտոնի համար պայքարը շարունակում են 5 կին և 3 տղամարդ թեկնածուներ։

ՄԱԿ-ի կանոնադրության համաձայն՝ Անվտանգության խորհուրդը գլխավոր քարտուղարի թեկնածուի վերաբերյալ առաջարկություն է ներկայացնում Գլխավոր ասամբլեային։ Վերջինս էլ համապատասխան բանաձևի միջոցով նշանակում է գլխավոր քարտուղարին, որն ընտրվում է հինգ տարի ժամկետով։

 ՄԱԿ-ի գործող գլխավոր քարտուղար Անտոնիու Գուտերեշի լիազորությունների ժամկետը լրանում է 2026 թվականի դեկտեմբերի 31-ին։