Աֆրինի քրդերի 50 տոկոսի արմատները հայկական են. Հրայր Ակիլյան
Աֆրինի քրդերի մի մասը հայերեն է խոսում եւ նրանց 50 տոկոսի արմատները հայկական են, մայրերը՝ Ցեղասպանությունից փրկված հայուհիներ, ասում է Հրայր Ակիլյանը, որի ընտանիքն Արեւմտյան Հայաստանից գաղթել է Սիրիա, հաստատվել Աֆրինի մոտակա բնակավայրում, ապա տեղափոխվել Հալեպ, հիմա՝ Երեւան, գրում է arevelk.am-ը: «Աֆրինի հայերը, բնականաբար այդ շրջան են հասել Հայոց ցեղասպանության տարիներին: Քաղաքի մոտակայքում կար Քաթմա անունով երկաթգծի կայարան, որտեղ հասնելով հայերը ոտքով շարժվում էին դեպի Աֆրին: 20-30 տարի առաջ Ադրինում դեռ հայ ընտանիքներ կային: Ճիշտ է՝ համայնքային կյանք չկար, եկեղեցի չունեին: Աֆրինին կից Ազազ քաղաքը կարեւոր հայկական բնակավայր էր, որտեղ ապրող հայ բնակչության թիվը հասնում էր մինչեւ 5000-ի եւ նրանք նույնիսկ եկեղեցի ունեին»,- ասում է Հրայր Ակիլյանը: Նրա խոսքով՝ նախապատերազմական Սիրիայում Աֆրինը հողագործական շրջան էր՝ հայտնի ձիթենիներով եւ պատահական չէ, որ արդիական ձեւերով ձեթ արտադրելու հմտությունները հայերն են բերել այդ շրջան: Աֆրինի ձեթի հռչակը դուրս էր եկել Սիրիայի սահմաններից եւ ամբողջ Սիրիան գիտի, որ Աֆրինում ձեթի արտադրությունը հայերն են զարգացրել՝ երկու հայ ընտանիքներ՝ Մակարյաններ եւ Տեր Վարդանյաններ, որոնք ձեթի գործարաններ էին հիմել, որոնք գործել են մինչեւ 70-ականները: «Հստակ տվյալներ չունեմ, բայց լսել եմ, որ մինչեւ այսօր էլ կան գործարաններ, որոնց տերերը հայեր են», - ասում է Հրայր Ակիլյանը: Թուրքական զինուժը հունվարի 19-ին ՝ Աֆրինի քրդերի դեմ Ձիթենու ճյուղ ռազմական գործողությամբ ներխուժել է Սիրիայի տարածք:
Հետևեք մեզ Viber-ում
