Թրամփը «դաս» է քաղել նախորդ տարի Սպիտակ տան աղմկոտ դրվագից․ Հակոբ Բադալյան
Հակոբ Բադալյանը գրել է․
«Տեղի է ունեցել Պուտին–Թրամփ հեռախոսազրույց, ինչպես ազդարարվել էր նախօրեին։ Հեռախոսազրույցը փաստորեն հաջորդում է Ուիտկոֆֆի եւ Քուշների Մոսկվա ու Կիև կատարած այցին։ Այստեղ իհարկե առհասարակ Կիևի դերն այնքանով է, որքանով կարևոր է Զելենսկուն պահել պրոցեսի մեջ՝ նաև նրա հանդեպ Եվրոպայի անմիջական գերակայություն թույլ չտալու համար։ Այդ իմաստով, Թրամփը «դաս» է քաղել նախորդ տարի Սպիտակ տան աղմկոտ դրվագից, երբ բավականին ամոթալի վերաբերմունքի արժանացած Զելենսկին պարզապես նետվեց եվրոպական առաջնորդների գիրկը։ Հիմա նրան «ներգրավված» են պահում ամերիկա–ռուսական երկխոսությանը՝ ամբողջապես եվրոպացիների ձեռքին չթողնելու համար։
Ինչ վերաբերում է անմիջական խոսակցությանը, որ ունենում են Մոսկվան ու Վաշինգտոնը, ապա դատելով Պուտինի օգնականի տարածած տեղեկատվությունից, կա ըստ էության որոշակի համակարգում։ Դրա մասին է վկայում այն, թե՝ Պուտինն ու Թրամփը պայմանավորվել են կապի մեջ մնալ, ըստ անհրաժեշտության հաղորդակցվելու համար։
Ընդհանուր առմամբ, նրանց խոսակցությունների մասին տարածվող տեղեկությունները թերևս վաղուց ստացել են որոշակի ստանդարտ, որին հղումներ անելը որպես ճշգրիտ եզրահանգման տարբերակ, թերևս մի փոքր կասկածելի է։ Ավելի շատ կա տպավորություն, որ այդ իրազեկման ստանդարտը բուն խոսակցության շղարշ է, քան մատուցում։
Մեծ հաշվով, կարծում եմ ներկայումս կարևոր հանգամանքը այն է, թե արդյո՞ք ինչ են քննարկում Մոսկվան ու Վաշինգտոնը ԱՄՆ միջանկյալ ընտրությանը Թրամփի դիրքերի առնչությամբ և արդյո՞ք դիտարկվում է դրանք պահելու որևէ օժանդակություն։ Անկասկած է թերևս, որ հնարավոր այդպիսի դիտարկման դեպքում տարբերակներից դուրս է Ուկրաինայում հրադադարը»։
Հետևեք մեզ Viber-ում
