Մահացությունների մոտ 48 %-ը պայմանավորված է սիրտ-անոթային հիվանդություններով.սրտաբան
«Ինչպես բնությունը, այնպես էլ մարդկային օրգանիզմը գարնան գալստյան հետ կարծես արթնաում է և ակտիվանում է արյան շրջանառությունը, բոլոր օրգան-համակարգերի ֆունկցիոնալ գործնեությունը և դա առաջին հերթին անդրադառնում է այն հիվանդների վրա, որոնք ունեն անոթային համակարգի հետ կապված խնդիրներ: Հատկապես սրացումներ են լինում հիպերտոնիկ հիվանդների մոտ »,- մարտի 4-ին հրավիրված ասուլիսի ժամանակ տեղեկացրեց ՀՀ ԱՆ գլխավոր սրտաբան Համլետ Հայրապետյանը: Առողջապահության նախարարության գլխավոր սրտաբան Համլետ Հայրապետյանը նման մարդկանց խորհուրդ է տալիս եղանակային փոփոխություններից առաջ դիմել իրենց բուժող կամ պոլիկլինիկայի բժիշկին: «Սեզոնային այս փոփոխությունների շեմին պետք է դիմել բժիշկի, որպեսզի կատարվեն համապատասխան շտկումներ իրենց բուժման մեջ կամ անհրաժեշտության դեպքում մեկ անգամ ևս ստուգման ենթարկվեն: Ինչ վերաբերում է հիպերտոնիկ հիվանդներին,ապա երբեմն հարկ է լինում ավելացնել հակահիպերտենզիվ, այսինքն՝ հակաճնշումային դոզաները և կանխել հնարավոր սրացումները: Ինքնաբուժությամբ զբաղվել կամ որոշակի այլ ինքնուրույն գործունեություն իրենց բուժման հետ կապված ՝ ես խորհուրդ չեմ տա»,-շեշտեց սրտաբանը: Սրտաբանը փաստում է, որ բնակչության ընդհանուր մահացության կեսը ՝ մոտ 48 %-ը պայմանավորված է սիրտ-անոթային հիվանդություններով: Սրտաբանի փոխանցմամբ՝ մեծ թիվ են կազմում նաև թաքնված հիպերտոնիկները, որոնք չնայած գանգատներին խուսափում են դիմել բժշկին: «Չբուժված հիվանդությունները հանգեցնում են սուր սրտային կամ սիրտ-անոթային խանգարումների , առաջին հերթին դա սրտամկանի կաթվածն և ինսուլտը ՝ ուղեղի կաթվածը, որոնք մահացության մեջ կազմում են առյուծի բաժինը: Իսկ եթե ժամանակին չենք դիմում բժիշկի, ապա , բնականաբար, կարող ենք ունենալ նաև հանկարծամահություն»,-նշեց բժիշկ Հայրապետյանը: Անդրադառնալով հիպերտոնիկ հիվանդների վիճակագրությանը՝ սրտաբանը նշեց. «Մոտավորապես մինչև 500 հազար մարդ տառապում է հիպերտոնիկ հիվանդությամբ»: Նրա խոսքով՝ սիրտ-անոթային հիվանդություններով էլ տառապում է բնակչության մեկ երրորդ մասը: Հիվանդության նախանշաններից սրտաբանն առաջին հերթին շեշտեց ցավը կրծքավանդակի հատվածում, սուր ծակոցները, հիշողության մթագնումը, հևոցը և ծանր շնչառությունը: Բժշկի խոսքով ՝ բոլոր սիրտ-անոթային հիվանդությունները չունեն բուժման միատեսակ ձև, յուրաքանչյուր հիվանդին անհատական բուժում պետք է ցուցաբերվի: Աստղիկ Ավագյան
Հետևեք մեզ Viber-ում
