Ի՞նչ է մտածում Սերժ Սարգսյանը. Ա. Գևորգյանից մինչև Հ. Հովսեփյան և Վ. Գասպարյան
Պետք է հիասթափեցնեմ անընդհատ հեղափոխություն անելու կողմնակիցներին: Մենք չենք շտապելու: Քաղաքական ոլորտում համակարգային փոփոխություններ կատարելիս շտապողականությունը և անխոհեմությունը երբեք լավ ավարտի չեն հանգեցրել», հայտարարեց Սերժ Սարգսյանը փետրվարի 12-ին իր հայտնի ելույթում եւ դրանից անմիջապես հետո «խոհեմաբար» լծվեց համակարգային փոփոխությունների: Այսպիսով՝ վերջին շաբաթների կադրային շարժը եւ հավանական զարգացումները թույլ են տալիս ասելու, որ նախագահ Սարգսյանը, մեծ հաշվով անխոհեմություն չի դրսեւորում կադրային ռակիրովկաներում: Փոփոխությունների մեկնարկը տրվեց ԱԱԾ պետի փոփոխությամբ, վարկաբեկված եւ հեւիհեւ հանրությանը ներկայացող տարեց Գորիկ Հակոբյանը իր տեղը զիջեց թարմ ուժի՝ ի դեմս Գեորգի Կուտոյանի, որը մինչ այդ նախագահի իրավական հարցերով խորհրդական էր: Նա Սերժ Սարգսյանի փեսա Միքայել Մինասյանի ընկերն է, ուսյալ երիտասարդ, որի նշանակումը սուր արձագանքներ առաջ չբերեց, քանի որ Կուտոյանը դեռեւս չմսխված ու չվարկաբեկված տեսակ է, ինչից չէր կարելի խուսափել, եթե Գորիկ Հակոբյանը փոխարինվեր համակարգի ցանկացած հին դեմքով: Այս նշանակմանը հաջորդեց դաշնակցական նախարարների ներմուծումը կառավարության կաբինետ: Այս քայլի պատճառների ու նպատակի մասին շատ է խոսվել ու ասվել է գրեթե ամեն ինչ, առանձնապես նոր հայտնություն չեն անի, հիշեցնելով, որ այն նպատակաուղղված էր ներիշխանական հարաբերություններում բալանսը պահելու եւ թիմին ինչ-որ բաներ հասկացնելուն… Լեւոն Յոլյանը՝ Վերահսկիչ պալատի նախագահի նախկին տեղակալը, այժմ Էներգետիկայի ու բնական բաշարների նախարար, համարվում է Սերժ Սարգսյանի շախմատի ընկերը, նրա ամենամտերիմ անձանցից մեկը, ով աչքի չի ընկնում սկանդալային պատմություններով: Կկարողանա՞ գլուխ հանել իրեն վստահված ոլորտից, միայն ժամանակը ցույց կտա: Այս համատեքստում ուշագրավ էր նախկին նախարար Երվանդ Զախարյանի պաշտոնանկությունը: Դեռեւս նշանակման ժամանակ մամուլում տեղեկություններ հայտնվեցին, որ որոշ նախարարներ, նրանց թվում Զախարյանն ու Հովհաննես Մանուկյանը իրենց մանտադի համար կլորիկ գումար են մուծվել: Զարմանալի էր, որ Սերժ Սարգսյանը գնաց նման քայլի, ինչը կնշանակի, որ նշվածների առջեւ ինչ-որ բան վերադարձնելու խնդիր է դրված եղել… Այսօր էլ նախագահն անձամբ ՊԵԿ ղեկավարի պաշտոնում ներկայացրեց իր վերահկողության ծառայության արդեն նախկին պետ Հովհաննես Հովսեփյանին: Սա այն բարդագույն ոլորտներից է, կարելի է ասել տնտեսության թափանիվներից մեկը, որը վերահսկում է երկրի ֆինանսկան շարժերը,իսկ Հայաստանը այսօր, իսկապես, հայտնվել է իսկապես ծանր եւ բարդ տնտեսական վիճակում եւ փաստացի պահվում է արտաքին վարկերի հաշվին, քանի որ որեւէ մեկին գաղտնիք չէ, թե ինչ մակարդակում է հարկային եւ մաքսային վարչարարությունը եւ ինչ արտացոլումներ են դրանք հաճախակի գտնում՝ էլ գործարարների ինքնասպանություններ, էլ փոքր ու միջին բիզնեսի սննկացման մասին ահազանգեր… ՊԵԿ նոր պետ Հովհաննես Հովսեփյանը քաղաքական երկարամյա կարիերայի ընթացքում վաստակել է փորձառու եւ հավասարակշռված անձնավորության համբավ,տիրապետում է կառավարման հմտություններին եւ Հովիկ Աբրահամյանի հետ աշխատանքային փորձ ունի: Իսկ ամենաուշագրավը Արմեն Գեւորգյանի վերադարձի հավանականությունն է, որը պետք էփոխարինի Վաչե Գաբրիելյանին: Այն որ Գեւորգյանը հմուտ ֆունկցիոներ է ու իր գործի գիտակ, որեւէ մեկը չի վիճարկի, սակայն նա համարվում է երկրորդ նախագահ Ռոբերտ Քոչարյանի <<մարդը>>: Հետաքրքիր է արդյոք նրա վերադարձով ազդարարվում է Սերժ Սարգսյան-Ռոբերտ Քոչարյան հակամարտության ավարտը ու վերջինի սահուն վերադարձը իշխանական համակարգ: Բայց նկատի ունենալով, որ նախորդ երկու նախահագներից եւ ոչ մեկի դեպքում չի գործել <<իշխանությունը տվեցի՝ ետ ստանալու ակնկալիքով>> ստվերային պայմանավորվածությունը, կարելի է կարծել, որ Սերժ Սարգսյանն ընդամենը իր ոճի մեջ է.նա իր սովորության համաձայն իր կողքին է պահում այսպես կոչված իր մրցակիների շրջապատին: Նրա թեկնածության համար պնդել է նաեւ Հովիկ Աբրահամյանը: Չի բացառվում, որ Արմեն Գեւորգյանի վերադարձով նպատակ է հետապնդվում հակակշռել Դավիթ Հարությունյանին, որը համարվում է գործող կառավարության շարժիչ ուժը: Ի դեպ երկուսն էլ հմտորեն տիրապետում են ներիշխանական խոհանոցին եւ ինտրիգանտի համբավ ունեն, հետեւաբար մրցակցությունը կարող է անկանխատեսելի հետեւանքներ ունենալ: Եւ, իհարկե, այս ներքին անցուդարձում չենք կարող շրջանցել ոստիկանապետ Վովա Գասպարյանին, ով Սերժ Սարգսյանին զուգահեռ թուրն առել ու ընկել է իր ղեկավարած համակարգի ջանին՝ փրթում է ու փրթում, ազատվում արատներից ու բարեփոխում համակարգը՝ ցույց տալով, որ ինքն էլ ոչ պակաս բարեփոխիչ է ու Սերժ Սարգսյանի արձակած ալիքը պետք է անցնի իր կողքով: Անի Սահակյան
Հետևեք մեզ Viber-ում
