Հացպանյանի մարմինը ՀՀ-ում է, հոգեհանգստի օրը չեն կարողանում որոշել, քանի որ ՊՆ-ից լուր չկա

Հայկական ժամանակը գրում է. Հունվարի 20-ին Ֆրանսիայի Լիոն քաղաքի կլինիկաներից մեկում ծանր հիվանդությունից մահացած Արցախյան ազատամարտի մասնակից, հասարակական, քաղաքական գործիչ Սարգիս Հացպանյանի մարմինն այսօր բերվել է Հայաստան։ Այս մասին մեր զրույցում ասաց Սարգիս Հացպանյանի կինը: Օրեր առաջ Հացպանյանի հարազատները դիմել էին ՀՀ ՊՆ՝ Հացպանյանին Եռաբլուրում հուղարկավորելու առաջարկով, իսկ ՊՆ-ն ժամանակ էր խնդրել որոշում կայացնելու համար: ՊՆ մամուլի խոսնակ Արծրուն Հովհաննիսյանը «Հայկական ժամանակ»-ի հետ զրույցում ասել էր, որ հատուկ ընթացակարգ կա դիմելու, եւ այդ ընթացակարգով դիմում չի եղել։ Եռաբլուրը պետական պանթեոն է, եւ այնտեղ հուղարկավորելու հատուկ կարգ կա, փաստաթղթեր են հավաքվում, պաշտոնական դիմում է գրվում եւ այլն՝ նման բան տեղի չի ունեցել: Հասմիկ Հացպանյանը նշեց, որ հունվարի 23-ին երկու դիմում-նամակ են գրել ՊՆախարարին՝ բարեկամները եւ ազատամարտիկները, սակայն պատասխան դեռ չեն ստացել: Արդյունքում չեն կարողանում հոգեհանգստի արարողության մասին որեւէ բան որոշել ու հայտարարել, քանի որ չգիտեն՝ ինչ է լինելու հուղարկավորության հարցը. «Զանգահարել ենք թեժ գիծ, մեզ ասացին, որ նամակը հասել է, բայց պատասխան դեռ չենք ստացել: Այսպես օդի մեջ կախված վիճակում ենք»,- ասաց տիկին Հացպանյանը: Սարգիս Հացպանյանին Եռաբլուր պանթեոնում իր զինակից ընկերների կողքին հուղարկավորելու նպատակով Change.org հարթակում սկսած ստորագրահավաքիարդյունքում արդեն 3300-ից ավելի ստորագրություն կա: Ստորագրահավաքի մասին խնդրագրում ասված է. «Հայ անվանի հասարակական գործիչ, Արցախյան ազատամարտի մասնակից Սարգիս Հացպանյանը մեծ ներդրում ունեցավ մեր պետականության կայացման գործում՝ զենքը ձեռքին մասնակցելով ազատամարտին, ապա իր հրապարակումներով ու ելույթներով խոսելով հայրենի երկրին օգտակար լինելու  իր տեսլականի մասին: Սարգիս Հացպանյանը անգնահատելի դեր ունեցավ հատկապես Արեւմտյան Հայաստանի հայերի ինքնության վերադարձի, քուրդ եւ թուրք առաջադեմ գործիչների կողմից ցեղասպանությունը ճանաչելու եւ աշխարհի տարբեր մասերում հայամետ նախաձեռնություններով հանդես գալու գործում: Մեր հայրենակիցը, ցավոք, մահկանացուն կնքեց շատ երիտասարդ՝ 55 տարեկան հասակում՝ ծանր հիվանդության պատճառով: Ներքոստորագրյալներս դիմում ենք ՀՀ պաշտպանության նախարարին՝ խնդրելով թույլ տալ Սարգիս Հացպանյանին արժանիորեն հուղարկավորել Եռաբլուր պանթեոնում՝ իր զինակից ընկերների կողքին»: Դա կլինի հայկական պետության գնահատանքը իր կյանքը հայրենիքին նվիրած գործչին»: