Որն է փոփոխության նպատակը.որ Սերժ Սարգսյա՞նը դառնա վարչապետ
2018 թվականի ապրիլից հետո վարչապետի նշանակման հարց ՀՀԿ-ն չի քննարկել։ Այդ մասին այսօր ՀՀԿ ԳՄ նիստից հետո լրագրողներին ասել է ՀՀԿ մամուլի քարտուղար, ԱԺ փոխնախագահ Էդուարդ Շարմազանովը։ Շարմազանովից լրագրողները հետաքրքրվեցին, թե այս փոփոխությունների նպատակն այն է որ Սերժ Սարգսյա՞նը դառնա վարչապետ, քանի որ խորհուրդը ղեկավարելու է վարչապետը՝ ապրիլից հետո: «2018 թվականի ապրիլից հետո կառավարության ձեւավորման, վարչապետի ընտրության հարց մենք մինչ օրս դեռ չենք քննարկել: Անվտանգության խորհրդի մասին օրենքը, կառավարության կառուցվածքի մասին օրենքը, առաջին փոխվարչապետի առկայությունը արված չէ այս կամ այն անձի համար, սա արված է հիմք ունենալով պետության արդյունավետ կառավարումը: Մենք, որ գնացել ենք այս կամ այն փոփոխությանը չի նշանակում, որ ցանկացել ենք այս կամ այն անձին վարչապետ տեսնել: Մենք հիմք ենք ունեցել պառլամենտական համակարգում ավելի արդյունավետ, ավելի անվտանգ կառավարում ձեւավորել»,- ասաց նա: Հարցին, թե փոխվարչապետի պաշտոնն էլ Կարեն Կարապետյա՞նն է զբաղեցնելու, Շարմազանովն ասաց. «Ինչպես նշեցիք պարոն նախագահի՝ վարչապետ, պարոն Կարապետյանի՝ փոխվարչապետ դառնալու հետ կապված, նշեմ, որ ՀՀԿ-ն եւ ՀՅԴ-ն ժողովրդից ստացել են այնքան մանդատներ, վստահություն, այսօրվա կոալիցիոն ուժերն ունեն քաղաքական լեգիտիմություն, որ ապրիլից նոր կառավարություն ձեւավորեն այնպես, ինչպես իրենք գտնում են ավելի նպատակահարմար ժողովրդի ու պետության ելնելով»,- ասաց Էդուարդ Շարմազանովը: «Հայաստանն իր արժեքային համակարգով Եվրոպա է: Մենք, իհարկե, ԵԱՏՄ, ՀԱՊԿ անդամ ենք և մեր հարաբերությունները շատ կարևոր են, սակայն մենք չենք հակադրում այդ երկուսը: Գտնում ենք, որ ուշ թե շուտ ԵԱՏՄ-ն և ԵՄ-ն պետք է համագործակցեն»,- ընդգծեց Շարմազանովը: ՀՀ ԱԺ փոխնախագահը նշեց նաև, որ ԳՄ նիստի ընթացքում ամփոփել ենք ՀՀ Նախագահ Սերժ Սարգսյանի Ֆրանսիա կատարած այցի արդյունքները, հանդիպումներն ու ելույթը Եվրոպայի խորհրդում: «Քննարկել ենք ներքին և արտաքին քաղաքական հարցեր ևս: Արձանագրել ենք ևս մեկ անգամ, որ Ֆրանսիան մեր բարեկամ երկիրն է, բոլոր ուղղություններով շարունակելու ենք մեր հարաբերությունների զարգացումն այդ երկրի հետ: Շատ կարևոր է, որ Հայաստանը հյուրընկալելու է Ֆրանկոֆոնիայի գագաթնաժողովը՝ այդ օրերին դառնալով է աշխարհի քաղաքական կենտրոններից մեկը»,- շեշտեց Շարմազանովը:
Հետևեք մեզ Viber-ում
