Միշուստինը հստակ օրինակներով Փաշինյանին կոնկրետ պատասխան է տվել

«Հայելի» մամուլի ակումբի տեղեկություններով՝ 2024 թվականի դեկտեմբերին և 2025 թվականի հուլիսին կայացած հանդիպումների ժամանակ ՌԴ վարչապետ Միխայիլ Միշուստինը Նիկոլ Փաշինյանին հավաստիացրել է, որ Հայաստանի՝ ԵՄ-ի հետ մերձեցման փորձերը Մոսկվայում դիտարկվում են որպես երկիրը աշխարհաքաղաքական առճակատման դաշտ ներքաշելու փորձ, ինչը չի կարող անտեսվել Ռուսաստանի կողմից։ Ըստ նրա՝ Հայաստանի խնդիրն է երկիրը զերծ պահել նման բախումների անհարկի զոհ դառնալուց։

Միշուստինը նաև ակնարկել է Արցախի ճակատագիրը՝ հիշեցնելով, որ Պրահայում՝ Եվրոպայի միջնորդությամբ ձեռք բերված պայմանավորվածություններից հետո, Արցախը հայաթափվեց, մինչդեռ Ադրբեջանի զինված ուժերի կողմից օկուպացված Հայաստանի ինքնիշխան տարածքները այդպես էլ չվերադարձվեցին։

Ավելին, մեր տեղեկություններով՝ Միշուստինը ներկայացրել է առարկայական օրինակներ, թե ինչպես Ռուսաստանը կարող է մինչև 2027 թվականի ավարտը կրկնապատկել Հայաստանի հետ առևտրաշրջանառությունը՝ ոչ միայն պատժամիջոցների տակ գտնվող ապրանքների (Միշուստինը նշել է էլեկտրոնիկան), այլև հայկական արտադրության ապրանքների հաշվին։

Նա նաև նշել է, որ ԵԱՏՄ Ընդհանուր ֆինանսական շուկայի հայեցակարգի թարմացման շրջանակում հայկական բանկերը կարող են օգտվել ֆինանսական լիցենզիաների փոխադարձ ճանաչման մեխանիզմից, ինչը կհեշտացնի նրանց մուտքը ԵԱՏՄ անդամ երկրների ֆինանսական շուկաներ։

Այս շփումներին հաջորդել են Հայաստանի կողմից ԵՄ-ին անդամակցության գործընթացի մեկնարկի մասին օրենքի ընդունումն ու եվրոպական ուղղությամբ հետագա քայլերը։

Մեր տեղեկություններով՝ վերջին շրջանում Փաշինյանը մեկ անգամ չէ, որ փորձել է Միշուստինի միջոցով հասնել հայկական առանձին ապրանքների նկատմամբ Ռուսաստանի կողմից կիրառվող փաստացի տնտեսական սահմանափակումների վերացմանը։ Սակայն բոլոր նման փորձերի դեպքում Միշուստինը հղում է արել Կրեմլին՝ նշելով, որ այդ հարցերն այլևս դուրս են իր պատասխանատվության շրջանակից։