Ո՞վ է ԱԱԾ վարկը ենթարկում այդպիսի անհարկի իրավիճակի ռիսկի. Բադալյան

Քաղաքագետ Հակոբ Բադալյանը գրել է.

«Հովիկ Աբրահամյանի որդու ձերբակալության առնչությամբ, ուշադրության արժանացնեմ մեկ այլ հանգամանք։ Ինչպես արդեն նշել եմ, տեսարանային հանգամանքի եւ դրա մոտիվների հարցը քննարկվում ու մեկնաբանվում է շատ։

Մարդիկ տեսնում են, որ ինչ-որ բարդույթի կամ քմահաճույքի համար, ԱԱԾ հատուկ ստորաբաժանումն օգտագործվում է մի իրավիճակում, երբ ակնհայտորեն չկա ոչ մի բարդություն, ոչ մի մասնագիտական հմտության կարիք, չկա որեւէ այդպիսի գործողության կարիք առհասարակ։ Հատուկ ստորաբաժանումն օգտագործվում է մի իրավիճակում, երբ չկա որեւէ դիմադրություն, չկա որեւէ փախուստ, որեւէ վտանգ։

Մինչդեռ, այդ կառույցը եւ հատկապես հատուկ ստորաբաժանումը ունի հենց հատուկ դեր, հենց հատուկ դեպքերի եւ իրավիճկների համար է այդ ստորաբաժանման ու կառույցի նշանակությունը։ Եվ այդ դեպքերի շնորհիվ է նաեւ ձեւավորվում հանրային հեղինակություն ու հարգանք՝ մասնագիտության, մասնագիտական առաքելության, պետական առաքելության հանդեպ։

 Երբ ինստիտուցիոնալ–ֆունկցիոնալ կիրառումը ակնհայտորեն անհարկի է, ակնհայտորեն՝ իրավիճակով չպահանջված եւ «չպատճառաբանված», ապա առնվազն ենթագիտակցորեն ձեւավորվում է հասարակության անլուրջ ընկալում, այն էլ մի կառույցի հանդեպ, որի հանրային վարկն ու հեղինակությունը, այդուհանդերձ, ունեն հիմնարար նշանակություն ցանկացած պետության համար։

Եվ, հետեւաբար, ինձ համար այստեղ հարց է առաջանում, թե ո՞վ եւ ինչի՞ համար է այդպես «զոհաբերում» Հայաստանի ԱԱԾ, ԱԱԾ հատուկ ստորաբաժանումների հեղինակությունը, դնում այդ կառույցը այդպիսի անհամաչափ, հետեւաբար հանրային ընկալման տեսանկյունից վերը նկարագրածս ռիսկը ենթադրող իրավիճակներում»։