ՖԻՖԱ-ն արձագանքել է Ինֆանտինոյի և նրա ենթադրյալ սիրուհու շուրջ սկանդալին

Ֆուտբոլի միջազգային ֆեդերացիան (ՖԻՖԱ) պաշտոնական հայտարարություն է տարածել կազմակերպության նախագահի հասցեին հնչած այն մեղադրանքների ֆոնին, ըստ որոնց՝ նա Եվրոպական ֆուտբոլային ասոցիացիաների միության (ՈւԵՖԱ) գլխավոր քարտուղարի պաշտոնում աշխատելու տարիներին ապահովել է փոխհատուցման վճարում իր նախկին սիրուհուն:

«ՖԻՖԱ-ի նախագահ Ջանի Ինֆանտինոն լիովին հերքում է այս մեղադրանքները, դրանք չեն համապատասխանում իրականությանը։ Կանոնադրության կամ կանոնակարգերի խախտման վերաբերյալ ցանկացած ենթադրություն զրպարտչական բնույթ է կրում։ ՈւԵՖԱ-ի կամ ՖԻՖԱ-ի ոչ մի աշխատակից երբևէ բողոք չի ներկայացրել Ինֆանտինոյի գործողությունների դեմ՝ նրա մասնակցությամբ միջադեպերի բացակայության պատճառով։ Կադրային բոլոր որոշումները, ներառյալ աշխատանքից ազատումները և արձակման նպաստների վճարումները, հաստատվել են լիազորված ղեկավարների կողմից՝ գործող կանոններին խիստ համապատասխան»,- ասվում է ՖԻՖԱ-ի տարածած հայտարարության մեջ։
Նշենք, որ ավելի վաղ ԶԼՄ-ներում լուրեր էին շրջանառվում, որ Ինֆանտինոն ՈւԵՖԱ-ում աշխատելու տարիներին պաշտոնի բարձրացում է ապահովել իր սիրուհու համար և հասել նրան արձակման նպաստի վճարմանը:

Հիշեցնենք, որ Ինֆանտինոն ՈւԵՖԱ-ում աշխատել է 2000 թվականի օգոստոսից: Կառույցի գլխավոր քարտուղարի պաշտոնը նա զբաղեցրել է 2009-ից մինչև 2016 թվականը։ 2016 թվականի փետրվարին նա ընտրվել է Ֆուտբոլի միջազգային ֆեդերացիայի նախագահ:

Armsport