Նախագահը հստակեցրեց՝ Արցախի պայքարը տարածքային վեճ չէ.Շարմազանով
«Եվս մեկ անգամ վերահաստատվեց, որ Հայաստանի Հանրապետությունը հաջողությամբ իրականացնում է դիվերսիֆիկացված արտաքին քաղաքականություն :Շատ կարևոր է, որ Մինսկի խմբի համանախագահ երկրներից մեկի նախագահի հետ համատեղ հայտարարությունում ՀՀ նախագահը ևս մեկ անգամ ուղիղ նշեց՝ Լեռնային Ղարաբաղի պայքարն ազատության ու մարդու իրավունքների համար պայքար է և չի կարող հաջողությամբ չպսակվել։ Նաև նշեց, որ Հայաստանի Հանրապետությունը խնդրի բացառապես խաղաղ կարգավորման կողմնակիցն է», - լրագրողների հետ հանդիպմանն անդրադառնալով նախագահ Սերժ Սարգսյան Ֆրանսիա կատարած այցին՝ ասաց ՀՀ ԱԺ փոխնախագահ Էդուարդ Շարմազանովը։
«Կարևոր էր նաև Ֆրանսիայի նախագահի դիտարկումը, որ ԼՂ հակամարտությունը պետք է լուծվի բացառապես խաղաղ, քաղաքական, փոխզիջումների ճանապարհով, որը կարող է իրականանալ նախկինում ձեռք բերված պայմանավորվածությունների իրականացմամբ։ Ո՞վ է տորպեդահարում այդ պայմանավորվածությունները՝ ո՛չ Հայաստանը, ո՛չ էլ Արցախը:Սերժ Սարգսյանն իր ելույթով նորից հստակեցրեց՝ Արցախի պայքարը տարածքային վեճ չէ Հայաստանի և Ադրբեջանի միջև՝ պայքար է ազատության և մարդու իրավունքների համար», - ասաց Էդուարդ Շարմազանովը։
«Ադրբեջանը գրեթե ցանկացած լուրջ քաղաքական իրադաձությունից հետո սահմանին սադրանքով է պատասխանում։ Ադրբեջանն այս պահվածքով ցույց է տալիս, որ պատրաստ չէ կառուցողական քննարկման։ Միջնորդների մոտ հանդիպումներին իրենք ասում են մի բան, իսկ իրականում դառնում են իրենց իսկ մաքսիմալիստական քաղաքականության զոհը։ Իրենք են իրենց մտցրել փակուղի», -անդրադառնալով այս գիշեր Արցախի հարավարևելյան ուղղությամբ հակառակորդի դիվերսիոն ներթափանցման փորձին՝ ասաց ՀՀ ԱԺ փոխնախագահը:
Հետևեք մեզ Viber-ում
