Իզորիան խոստացավ գալ Հայաստան

Հունվարի 24-ին Վրաստանում ՀՀ դեսպան Ռուբեն Սադոյանը հանդիպում ունեցավ Վրաստանի պաշտպանության նախարար Լեւան Իզորիայի հետ։ Այս մասին տեղեկացնում է ԱԳՆ մամուլի ծառայությունը: Հանդիպման սկզբում դեսպան Սադոյանը նախարար Իզորիային փոխանցեց ՀՀ պաշտպանության նախարար Վիգեն Սարգսյանի ողջույնները։ Զրուցակիցները մտքեր փոխանակեցին Հայաստանի եւ Վրաստանի միջեւ ռազմական համագործակցության ծրագրով նախատեսված միջոցառումների ընթացքի եւ հետագա հեռանկարային ուղղությունների վերաբերյալ՝ այս համատեքստում հատկապես կարեւորելով ռազմական կրթության եւ ռազմական բժշկության ոլորտներում համագործակցությունը։ Նախարար Իզորիան գոհունակություն հայտնեց երկու երկրների միջեւ առկա ռազմական համագործակցության կապակցությամբ եւ հայտնեց, որ այս տարի նախատեսված է իր պաշտոնական այցը Հայաստան։ Հանդիպմանը մասնակցում էին նաեւ Վրաստանի պաշտպանության նախարարի առաջին տեղակալ Լելա Չիքովանին, Վրաստանում ՀՀ դեսպանության ռազմական կցորդ, գնդապետ Սամվել Ռամազյանը եւ դեսպանության խորհրդական Կարեն Պարունակյանը։ Իսկ Վրաստանում Հայաստանի դեսպանատան հաղորդագրության համաձայն, Լեւան Իզորիան երախտագիտություն է հայտնել հայկական կողմին՝ Վրաստանում 2017-ին անցկացված ՆԱՏՕ-ի Noble Partner բազմազգ ռազմական ուսումնական վարժանքներին մասնակցելու համար եւ հույս հայտնել, որ այս տարի եւս հայ զինծառայողները կմասնակցեն Noble Partner-2018-ի զորավարժություններին: