Wildberries-ն իրականացրել է տուժած վաճառողներին աջակցող վճարումների երկրորդ փուլը

Wildberries-ի մամուլի ծառայության պաշտոնական ալիքի փոխանցմամբ՝ ընկերությունն իրականացրել է աջակցող վճարումների երկրորդ փուլը այն վաճառողների համար, որոնց ապրանքները վնասվել են ընկերության լոգիստիկ օբյեկտների վրա իրականացված հարձակումների հետևանքով։

Վճարումների երկրորդ փուլում ընդգրկվել են ավելի քան 97 հազար փոքր և միջին ձեռնարկատիրության ներկայացուցիչներ, այդ թվում՝ նաև այն վաճառողները, որոնք արդեն ստացել էին առաջին փուլով նախատեսված աջակցող վճարումները։ Գումարները մոտ ժամանակում կփոխանցվեն նրանց Wildberries հարթակի հաշվեկշիռներին, իսկ դրանց դուրսբերումը հնարավոր կլինի գործող վճարումների ժամանակացույցին համապատասխան։

Ավելի վաղ Wildberries-ն արդեն իրականացրել էր աջակցող վճարումների առաջին փուլն՝ ընդգրկելով ավելի քան 88 հազար ձեռնարկատիրոջ։ Բացի այդ, ընկերությունը գործարկել է վաճառողներին աջակցող մի շարք լրացուցիչ միջոցառումներ, այդ թվում՝ սեփական միջոցների հաշվին ավելացրել է գնորդների համար նախատեսված զեղչերի ֆինանսավորումը, տրամադրել է արտոնյալ պայմաններ պահեստավորման և լոգիստիկ ծառայությունների համար, ինչպես նաև նախաձեռնել այլ նախաձեռնություններ, որոնք ուղղված են վաճառքների պահպանմանն ու ձեռնարկատերերի բիզնեսի կայունության ապահովմանը։

Wildberries-ը շարունակելու է փուլային կերպով իրականացնել վաճառողներին աջակցող միջոցառումները և գործընկերներին պաշտոնական հաղորդակցման ալիքներով տեղեկացնել հետագա որոշումների մասին։

Հուլիսի 18-ից Ռուսաստանի տարբեր շրջաններում «Wildberries»-ի մի շարք պահեստներ և լոգիստիկ կենտրոններ ենթարկվել են ուկրաինական անօդաչու թռչող սարքերի հարվածների։ Դրանց հետևանքով հրդեհներ են բռնկվել, վնասվել են պահեստավորված ապրանքները, իսկ ընկերության բաշխման ցանցի աշխատանքը որոշ ուղղություններով խաթարվել է։ Հուլիսի 30-ին հարվածներ են գրանցվել նաև Պենզայի և Սարապուլի լոգիստիկ օբյեկտներում։

Տուժածների թվում կան նաև Հայաստանից հարթակի միջոցով առևտուր իրականացնող տնտեսավարողներ։ Առանձին հայաստանցի վաճառողներ հայտնել են մի քանի միլիոն դրամի հասնող կորուստների մասին։

«Wildberries»-ը ավելի վաղ հայտարարել էր, որ առաջին աջակցության վճարները տրամադրվել են ավելի քան 88 հազար վաճառողի։ Ընկերությունը տուժած վաճառողների համար սահմանել է նաև անվճար տարանցիկ մատակարարումներ տարածաշրջանային պահեստներ, ապրանքների պահպանման զեղչեր, վարկային արձակուրդներ և լոգիստիկ ծախսերը մեղմող այլ միջոցներ։