Նախագահը ԵԽԽՎ ամբիոնից Թուրքիային հիշեցրեց

«2008 թվականին՝ իմ ընտրվելուց հետո, ես նախաձեռնեցի հայ-թուրքական բանակցությունների հրապարակայնացում և արդյունքում հանդիպումներ տեղի ունեցան Թուրքիայի նախագահի և իմ միջև։ Բանակցությունները ինտենսիվորեն շարունակվեցին և մենք Շվեյցարիայում ՄԱԿ-ի անվտանգության խորհրդի մշտական անդամների, արտաքին գործերի նախարարների մասնակցությամբ ստորագրեցինք երկու փաստաթուղթ՝ Հայաստանի և Թուրքիայի միջև հարաբերություններ հաստատելու մասին», - ԵԽԽՎ ձմեռային նստաշրջանին պատասխանելով Թուրքիայի ներկայացուցչի հարցին՝ ասաց ՀՀ նախագահ Սերժ Սարգսյանը։ Նա հիշեցրեց՝ այդ փաստաթղթերում շատ հստակ ամրագրված է, որ այդ հարաբերությունները պետք է հաստատվեն առանց նախապայմանների։ «Բայց, ցավոք, արձանագրությունները ստորագրելուց հետո թուրքական կողմը մշտապես փորձում է նախապայմաններ առաջ քաշել։ Մենք միջազգային պրակտիկայում այդպիսի օրինակի չենք հանդիպել։ Բոլոր պայմանները բանակցվում են մինչև փաստաթուղթ ստորագրելը։ Իսկ փաստաթուղթ սոտրագրելուց հետո տարրական բարոյականությունը պահանջում է կատարել այդ փաստաթղթի պահանջները։ Մենք հիմա արդեն 9 տարի անց նորից լսում ենք թուրքական կողմից ինչ-որ քայլեր ձեռնարկելու անհրաժեշտություն: Փաստաթղթում շատ հստակ ամրագրված է՝ հաստատել հարաբերություններ, այնուհետև անդրադառնալ երկու երկրների միջև եղած բոլոր կնճռոտ հարցերին։ Իսկ թուրքական կողմը նախապայմաններ է առաջադրում։ Մենք երբեք որևէ նախապայման չենք կարող ընդունել։ Այո՛, Թուրքիան հզոր պետություն է, հսկայական պոտենցիալ ունի, և Հայաստանի պոտենցիալը չի կարելի համեմատել Թուրքիայի հետ, բայց դա չի նշանակում, որ Թուրքիան ուժի դիրքերից պետք է խոսի Հայաստանի հետ։ Եթե այդպես լինի, ապա Թուրքիայից շատ ավելի հզոր երկրներ կան՝ բնակչության և տնտեսական առումով։ Այդ հզոր երկրներն էլ պետք է Թուրքիայի հետ խոսեն ուժի դիրքերից կամ նախապայմանների լեզվով։ Կարծում եմ, որ թուրքական իշխանությունները այդպիսի մոտեցում երբեք չեն ընդունի։ Այդպես էլ մենք չենք ընդունում այդպիսի մոտեցումներ», - ընդգծեց նախագահը։ Նա հիշեցրեց՝ մինչև գարուն այդ արձանագրությունները Հայաստանի կողմից առ ոչինչ են հայտարարվելու։