Անօդաչու թռչող սարքից հարված. Կրակովի հանդիպման «արդյունքը»
Հունվար 20-ին Լեռնային Ղարաբաղի պաշտպանության բանակը հայտնեց, որ ադրբեջանական կողմը շփման գծի հյուսիսային հատվածում անօդաչու թռչող սարքից հայ դիրքապահների ուղղությամբ կիրառել է ականանետի արկ. «Ոտնահարելով նախօրեին ԵԱՀԿ Մինսկի խմբի համանախագահների միջնորդությամբ Կրակովում կայացած հանդիպման ընթացքում ստանձնած պարտավորությունները, որով կողմերին կոչ էր արվել իրականացնել վստահության ամրապնդման միջոցառումներ՝ հակառակորդը հունվարի 20-ին՝ ժամը 14:50-ի սահմաններում, արցախա-ադրբեջանական հակամարտ զորքերի շփման գծի հյուսիսային հատվածում դիմել է հերթական սադրանքի՝ անօդաչու թռչող սարքից հայ դիրքապահների ուղղությամբ կիրառելով ականանետի արկ»: Ադրբեջանական զինուժի նախահարձակ գործողության արդյունքում ՊԲ-ն որևէ կորուստ չի ունեցել: Ադրբեջանի պահվածքն, այսպիսով, կրկին «տեղավորվում» է օրեր առաջ տեղի ունեցած բանակցություններում ձեռքբերված պայմանավորվածությունները խափանելու շրջանակներում: Լեհաստանում, օրերս, հիշեցնենք, կայացավ Նալբանդյան-Մամեդյարով հանդիպումը՝ ԵԱՀԿ Մինսկի խմբի համանախագահների մասնակցությամբ: Միջնորդների տարածած հաղորդագրությունում ասվում էր, որ արտգործնախարարներն ու համանախագահները քննարկել են ավելի վաղ տեղ ունեցած գագաթնաժողովներում ղարաբաղյան հակամարտության կարգավորմանն ուղղված պայմանավորվածությունների իրականացմանն ուղղված քայլերը. «Արտգործնախարարները սկզբունքորեն համաձայնություն են հայտնել համանախագահների վերամշակած փաստաթղթին, որը վերաբերում է ԵԱՀԿ նախագահի անձնական ներկայացուցչի գրասենյակի ընդլայնմանը, ցանկություն հայտնելով հնարավորինս շուտ ավարտուն տեսքի բերել փաստաթուղթը»։ «Նախարարներն ու համանախագահները նկատել են, որ շփման գծում համեմատաբար հանգիստ իրավիճակ է, և համանախագահները կոչ են արել կողմերին պահպանել այդ դրական միտումը», ասվում էր հայտարարությունում։ ԵԱՀԿ ՄԽ-ի համանախագահներ Պոպովը, Վիսկոնտին և Շոֆերը ծրագրում են փետրվարի սկզբին տարածաշրջան այցելել։ Ուշագրավն այն է, որ Կրակովի բանակցությունների հետո պաշտոնական Բաքուն մի քանի հայտարարություններ արեց: ԵԱՀԿ Մինսկի խմբի համանախագահները «մի շարք ստեղծարար գաղափարներ են առաջարկել» ղարաբաղյան խնդրի կարգավորման ուղղությամբ, Կրակովում տեղի ունեցած հանդիպումից հետո նշեց Ադրբեջանի արտգործնախարար Էլմար Մամեդյարովը: Նրա խոսքով, նախ համանախագահների և ԵԱՀԿ գործող նախագահի անձնական ներկայացուցչի, ապա նրանց մասնակցությամբ՝ Հայաստանի արտգործնախարար Էդվարդ Նալբանդյանի հետ բանակցությունները տևել են շուրջ վեց ժամ: «Ըստ էության, հանդիպումներն անցել են դրական մթնոլորտում, հիմնական մոտեցումն է՝ կարգավորման ուղղությամբ առաջընթացի, խաղաղության ու կայունության համար անհրաժեշտ է շարունակել առավել ինտենսիվ, բովանդակալից ու տրամաբանական բանակցությունները», ասել էր Ադրբեջանի արտգործնախարարը: Բաքուն, փաստորեն, անօդաչու թռչող սարքից հայ դիրքապահների ուղղությամբ կիրառած ականանետի արկով է պատասխանում Կրակովի բանակցություններին: Դրանից կարելի է եզրակացնել, որ Ադրբեջանն, ինչպես միշտ դժգոհ է բանակցությունների ընթացքից, իսկ ավելի ճիշտ՝ բանակցություններում ձեռքբերված պայմանավորվածություններից: Այսինքն, այն, ինչին չեն կարողանում ընդդիմանալ բանակցությունների սեղանի շուրջ՝ հակազդում են շփման գծում «գործողություններով»: Բաքվի պահվածքն, այսպիսով, նմանվում է հետբանակցային սաբոտաժի. Հերթական անգամ Բաքուն ցույց է տալիս, թե որքան «լուրջ» է վերաբերվում բանակցությունների ընթացքում ձեռքբերված պայմանավորվածություններին: Թամար Բագրատունի
Հետևեք մեզ Viber-ում
