Հայաստանի և Ադրբեջանի միջև անհայտ կորած անձանց տվյալների բազա կստեղծվի
Անհայտ կորած անձանց միջազգային հանձնաժողովի (ICMP) գլխավոր տնօրեն Քեթրին Բոմբերգերը հայտարարել է, որ Ադրբեջանի և Հայաստանի միջև կստեղծվի անհայտ կորած անձանց տվյալների բազա, որը հիմնված կլինի նախկին Հարավսլավիայում կիրառված համագործակցության մոդելի վրա։
«Արմենպրես»-ի փոխանցմամբ՝ ինչպես հայտնում է ադրբեջանական APA գործակալությունը, Քեթրին Բոմբերգերն այդ մասին ասել է «Անհայտ կորած անձանց հարցի լուծման ժամանակակից մոտեցումները և համագործակցության ամրապնդումը» համաժողովի ժամանակ։Նրա խոսքով՝ տվյալների բազան կարևոր նշանակություն կունենա պետական կառույցների միջև համագործակցության ամրապնդման, Ադրբեջանի կառավարության և անհայտ կորածների ընտանիքների միջև կապերի զարգացման, ինչպես նաև Ադրբեջանի և Հայաստանի միջև տեղեկատվության փոխանակման տեսանկյունից։
«Սա այն մոդելն է, որի ստեղծմանը մենք աջակցել ենք, օրինակ, նախկին Հարավսլավիայի համատեքստում։ Այսօր այդ տարածաշրջանի կառավարությունները, թեև հակամարտությունից անցել են երկար տարիներ, ստեղծել են անհայտ կորած անձանց հարցերով համատեղ աշխատանքային խումբ և ձևավորել միասնական տվյալների բազա՝ դեռևս չփակված գործերի վերաբերյալ։ Այդ բազայի միջոցով նրանք տեղեկատվություն են փոխանակում։ Հուսով ենք, որ այս տվյալների բազան նույնպես կնպաստի նման արդյունքների։ Առաջին հայացքից այն կարող է թվալ պարզապես տեխնիկական գործիք, սակայն իրականում այն համագործակցության և խաղաղության հաստատման կարևոր մեխանիզմներից մեկն է»,- ասել է նա։
Հիշեցնենք, որ նույն համաժողովի շրջանակներում Ադրբեջանի պետական անվտանգության ծառայության պետի տեղակալ Շարաֆաթ Հասանովը հայտարարել էր, որ ստեղծվելիք բազայի շնորհիվ Հայաստանի և Ադրբեջանի քաղաքացիների համար նախատեսվում է ստեղծել հնարավորություն՝ գաղտնիության պայմաններում տեղեկություններ տրամադրելու անհայտ կորած անձանց, այդ թվում՝ հնարավոր թաղման վայրերի վերաբերյալ։
Հետևեք մեզ Viber-ում
