Բոլթոնին սպառնում է ազատազրկում

ԱՄՆ նախագահի ազգային անվտանգության հարցերով նախկին խորհրդական Ջոն Բոլթոնն իրեն մեղավոր է ճանաչել գաղտնի տվյալներ ապօրինի պահելու մեջ, հաղորդում է ՌԻԱ Նովոստին՝ հղում անելով ամերիկյան լրատվամիջոցներին։

«Ազգային անվտանգության նախկին խորհրդական Ջոն Բոլթոնը այսօր դաշնային դատարանում իրեն մեղավոր է ճանաչել մեղադրանքի մեկ կետով՝ Թրամփի առաջին պաշտոնավարման ժամանակ ազգային անվտանգությանը վերաբերող և նրա աշխատանքի հետ կապված տեղեկատվության ապօրինի պահման մեջ», - նշվում է հաղորդագրության մեջ։

Բոլթոնին մեղադրանք է առաջադրվել այն բանի համար, որ նա իր մոտ պահել է օրագրային գրառումներ Դոնալդ Թրամփի առաջին նախագահական ժամկետում Սպիտակ տանը աշխատելու մեկ տարվա ընթացքում: Պաշտպանական կողմը պնդել է, որ նա արդեն 45 տարի անձնական օրագրեր է պահում, գրառումները գաղտնի բնույթ չեն կրել և հասանելի են եղել միայն մերձավոր ազգականներին:

Թրամփի թիմից հեռանալուց հետո Բոլթոնը քննադատական ​​դիրքորոշում է ընդունել նրա նկատմամբ։ 2020 թվականին նա գիրք է հրատարակել, որում կտրուկ քննադատել է Թրամփին։ 2025 թվականի օգոստոսին ՀԴԲ-ն խուզարկել է Բոլթոնի տունը, որից հետո նրան մեղադրանք է առաջադրվել։

Բոլթոնի դատավճռիհրապարակումը նշանակված է հոկտեմբերի 28-ին։ Մեղավորությունը ապացուցելու դեպքում նրան սպառնում է մինչև հինգ տարի ազատազրկում։