Դուրս են գալու փողոց այն մարդիկ, որոնք անգամ աշխատանք ունեն. Արամ Սարգսյան

Շառլ Ազնավուրի հրապարակում մեկնարկած բողոքի ակցիայի ժամանակ «Ելք» խմբակցության պատգամավոր Արամ Սարգսյանն ասել է, որ իշխանության դեմ պայքարելու միակ միջոցը հանրային պայքարն է։«Այս իշխանությունը, այդ հարկային օրենքները որ բերել է, ասում է՝ լավ ենք արել, օրենքը փոխել ենք: Տեսականորեն նույնն է ասում նաև երկրի նախագահը։ Փորձում են հասարակության համոզել, որ իրենք ճիշտ են։ Այդ օրենքները սխալ են, իրականում խփում են այն սուբյեկտներին, որոնք մաքուր են: Իշխանություններն իրենք չեն ուզում 50-60 տոկոս ստվերը բերեն բյուջե, այլ գնում են այլ ոլորտներին հարվածելու, որոնք բաց են, մաքուր են, ստվերում չեն աշխատում։ Իշխանության դեմ պայքարելու միակ միջոցը հանրային պայքարն է, հանրային բողոքն է»,- նշել է Արամ Սարգսյանը։ Այնուհետև նա ասել է, որ իրենք պայքարում են թանկացումների դեմ. «Սա պայքար է թանկացնողների դեմ, իսկ թանկացումներ արել են իշխանությունները: Մենք ասում ենք՝ սխալ եք արել, հետողորմյա արեք, օրենքները փոխեք»: Ըստ նրա՝ կա զանգված, որը պատրաստ է դուրս գալ պայքարի: «Կա զանգված, որի դեպքում ոչ իշխանությունը, ոչ ոստիկանությունը, ոչ զինված ուժերը չեն միջամտում: Նման օրինակներ եղել են թե Վրաստանում, թե Ուկրաինայում: Վաղը, մյուս օրը դուրս են գալու փողոց այն մարդիկ, որոնք անգամ աշխատանք ունեն։ Միանալու են գյուղացիները, որոնք դիզվառելիքի այս գներով չեն կարողանալու իրենց հողը մշակեն »,- փաստել է նա: