Տիգրան Հակոբյանը նենգափոխո՞ւմ է

«Հեռուստառադիոպետկոմ»-ի եւ «Արմենպրես» լրատվական գործակալության նախկին նախագահ եւ տնօրեն Տիգրան Հակոբյանը այսօր Ֆեյսբուքում մի ուշագրավ գրառում է արել, որը քննարկման բուռն թեմա է դարձել ժամանակին իր հետ աշխատողների շրջանում։ Հակոբյանը գրել է․«Ցանցերում նորից թարմացրեցին էն հին ու ստոր բամբասանքը, թե իբր Վազգենի ապտակից հետո Արմեն Սարգսյանը 1997-ի փետրվարին «փախավ» Լոնդոն և հրաժարական տվեց վարչապետի պաշտոնից: Վազգենի աչքերը դեղնում էին զայրույթից, երբ ինչ-որ տեղ կարդում էր դրա մասին: Արմեն Սարգսյանը լուրջ հիվանդություն ուներ, փառք Աստծո և ժամանակակից բժկությանը, որ ապաքինվեց: Վազգենի հետ էլ ոչ միայն գործընկերներ էին, այլ նաև պարզապես ընկերներ, բարեկամներ: 1999 թ. սեպտեմբերին Արմեն Սարգյսանը Լոնդոնից գալիս է Վաշինգտոն: Վազգենին օգնում է նախապատրաստվել փոխնախագահ Ալբերտ Գորի ու այլ պաշտոնյաների հետ բանակցություններին: Հանդիպումներից առաջ քննարկում էին բոլոր նյուանսները, մի մասին ես մասնակցել եմ, մինչև խորը գիշեր: Հաստատ, լավ ընկերներ էին և համախոհներ: Պետք չի պղծել Վազգենի հիշատակը, պետք չի էժան հնարքներով վարկաբեկել Արմեն Սարգսյանին: Նրանցից ոչ մեկը թույլ չէր տա ոչ ապտակել, ոչ ապտակն անհետևանք թողնել: Նկարում «ծեծող» Վազգեն Սարգսյանն ու «ծեծվող» Արմեն Սարգսյանը Վաշինգտոնում 1999-ին: Հուսով եմ, վերջ կտանք էդ ժամկետանց հիմար ասեկոսեին»: Այս գրառումը թարմացրել է շատերի հիշողությունը ու մեզ պատմեցին, որ 1997-ին, երբ Հանրայինը հեռարձակվում էր վարչապետի պաշտոնից փախուստի դիմած Արմեն Սարգսյանի հրաժարականի դիմումը՝ Լոնդոնից, հեռուստաընկերության սենյակներում աշխատակիցները զվարճանում էին՝ գիտենալով հրաժարականի բուն պատճառը, որը հիվանդությունը չէր, ինչպես ներկայացվեց պաշտոնապես։ Այդ զվարճացողների մեջ է եղել նաեւ Տիգրան Հակոբյանը։ Լուսանկարը հրապարակել է Տիգրան Հակոբյանը