Անթալիայի նահանգապետ. «11 տարի է արդարություն և խիղճ ենք փնտրում, բայց չենք գտնում»

Այսօր լրանում է Հրանտ Դինքի սպանության 11-րդ տարին: «Ակօս» թերթի հիմնադիր-խմբագիր Հրանտ Դինքի սպանության տարելիցի առթիվ, Անթալիայի նահանգապետ Ֆաթմա Քայաօղլին հանդես է եկել հայտարարությամբ: Այս մասին հայտնում է Ermenihaber-ը: Քայաօղլին նշել է. «Հրանտ Դինքի սպանությունից անցավ 11 տարի: Մեր եղբայրը ոչ միայն հայ էր, այլեւ քուրդ, թուրք, բոսնիացի, վրացի, ասորի, արաբ, քրիստոնյա, իսլամ, եզդի: Նա կրում էր ժողովուրդների համերաշխության ընդհանուր բարությունը»: Նահանգապետը հայտարարության մեջ նշել է նաեւ, որ Թուրքիայի մեջ ազգայնակն դրսեւորումները հաճախ օրինական բնույթ են կրում, հետեւաբար՝ ազգայնամոլների հարձակումները դիտարկվում են որպես ժողովրդի բնական արձագանք: Ըստ Քայաօղլիի, Դինքը դարձել է հենց այդպիսի ազգայնական արձագանքի զոհ: «Արդեն 11 տարի արդարություն ու խիղճ ենք փնտրում, բայց չենք գտնում: 11 տարի է՝ դիմում ենք դատաիրավական համակարգին, կառավարությանը, խորհրդարանին, սակայն արդյունք չկա: 11 տարի մենք փողոցում էլ խոսում ենք մարդասպանների մասին, որ այս սպանության հետեւում են, թիկունքում, սակայն մեզ լսողներ չկան: Հրանտին սպանողներին ու նրանց աջակիցներին պետք է հայտնենք, որ նման սպանություններ այլեւս մի փորձեք իրականացնել, այս հողերի վրա բազմաթիվ Հրանտներ են ապրում, ու հետո էլ շարունակելու են ապրել»,- ասել է Անթալիայի նահանգապետն իր հայտարարության տեքստում: Հիշեցնենք, որ Հրանտ Դինքը սպանվել է 2007 թվականի հունվարի 19-ին, Ստամբուլում, գլխին արձակված 3 կրակոցից: Կրակելիս սպանողը բարձրաձայն արտաբերել էր «Գյավուր»՝ թշնամի, ինչը թույլ է տալիս ենթադրել, որ սպանությունը տեղի էր ունեցել ազգայնական հողի վրա: 2012-ին, դատարանի որոշմամբ, Դինքի սպանության կազմակերպիչ Եասին Հայալը դատապարտվեց ցմահ ազատազրկման, իսկ սպանությունն իրականացրած Օգյուն Սամասթը՝ 22 տարվա ազատազրկման: 2014-ին, Պոլսի ծանր հանցագործությունների դատարանը որոշեց վերաքննել Դինքի սպանության գործը: