«Շտապ օգնություն» Ծառուկյանից
«Ծառուկյան» խմբակցության ղեկավար Գագիկ Ծառուկյանը միշտ չէ, որ Ազգային ժողով է գնում: Կարելի է ասել, որ ընդհանրապես չի գնում, բացառությամբ ընտրություններից հետո առաջին նիստերի: Իսկ եթե գնում է, ուրեմն կարևոր բան կա ասելու: Ինչպես օրինակ այսօր, երբ Ծառուկյանը խորհրդարան էր գնացել եւ ինքնակամ ուղղվել լրագրողների գիրկը՝ պատասխանելով նրանց հարցերին, կամ ավելի ճիշտ հնչեցնելով այն, ինչն ինքն էր ուզում։ Այսպիսով՝ քանի մոտենում է ապրիլը, այնքան խռովահույզ է դառնում ներիշխանական ծովը։ Վարչապետ Կարեն Կարապետյանը ամանորյա տոներից ու հաջորդած արձակուրդից հետո վերադառնալով ակտիվ գործունեություն է ծավալել՝ տպավորություն ստեղծելով, թե չի պատրաստվում հանգիստ զիջել վարչապետական աթոռը, որի միակ ու անփոխարինելի հավակնորդը Սերժ Սարգսյանն է։ Իսկ այս դիմադրությունը ստիպում է իշխանությունում բեւեռներ ձեւավորել, ցույց տալ՝ ով ում կողմից է, ով ում բարեկամն է։ Պատահական չէ, որ չհանդիսանալով ԱԺ խորհրդի անդամ Գագիկ Ծառուկյանն անցած շաբաթ այցելեց նախագահական նստավայր, որտեղ կայացավ Սարգսյանի եւ ԱԺ խորհրդի հանդիպումը։ Այսօր Ծառուկյանը պարզաբանեց, որ իրեն Սերժ Սարգսյանն է հրավիրել՝ որպես Ծառուկյան խմբակցության ղեկավար։ Իսկ Աժ-ում ԲՀԿ ղեկավարը հասցրեց լիաթոք հավատարմություն հայտնել Սերժ Սարգսյանին, ասելով․ «Չի բացառում, որ իրենք աջակցեն Հանրապետականի ներկայացրած նախագահի թեկնածուին»,- ասել է Ծառուկյանը, ապա որոշակի խմբագրել խոսքը․ «Նայած՝ թեկնածուն ով ա, եթե այսօր մեր ժողովուրդը լիարժեք իրավունք է տվել հանրապետականին՝ ընտրելու առանց մեզ և առանց «Ելք»-ի, ինչի՞ մասին է խոսքը»: Ինչպես հայտնի է, տարեվերջին «Ելք» դաշինքն էր նախագահի թեկնածու առաջադրել և դիմել էր «Ծառուկյան» դաշինքին` իրենց թեկնածուին աջակցելու խնդրանքով: Այն ժամանակ ծառուկյանականները մերժեցին և այդ մերժումը պատճառաբանեցին նրանով, թե իբր «Ելքը» պարտավոր էր նախապես իրենց հետ խորհրդակցել, թե ում է առաջադրում և նոր միայն խոսել համագործակցելու մասին: Հետո հասկանալով, որ քաղաքականության մեջ դա մանկական մոտեցում է, նոր պատճառաբանություն ներկայացվեց, թե իբր չունեն համապատասխան թվով պատգամավորներ ու այդ պատճառով չեն գնում պարտության։ Ուշագրավ է, որ ՀՀԿ-ն դեռ թեկնածու չունի, սակայն նրանք արդեն իսկ պատրաստ են իրենց ձայնը տալ այդ անհայտ թեկնածուին` բոլորովին չպահանջելով, որ Հանրապետականը նախապես համաձայնության գա իրենց հետ: Ծառուկյանը բացառել է նաեւ Ելք-ի կազմակերպած երթին իրենց մասնակցությունը։ «Դուք ո՞նց եք մտածում, եթե այսօր Ծառուկյանը հայտարարում է, մեր ընտրողները դուրս են գալիս փողոց, հարցի լուծումը ո՞րն է: Մենք պետք է աղմո՞ւկ բարձրացնենք, թե հարցը կարգավորենք»: Նա հավելել է, որ իրենք կմասնակցեն այդ թեմայով խորհրդարանում կայանալիք լսումներին, իրենց կարծիքը կասեն, հետո կտեսնեն, թե ինչ որոշում է ընդունվում: Նա հիշեցրել է, որ նախորդ տարվա սեպտեմբերին էր Ծառուկյան դաշինքը նիստ հրավիրել՝ ուղղված Հարկային օրենսգրքում փոփոխություններ կատարելուն, որպեսզի գնաճը մեղմվեր: Բայց, ըստ Ծառուկյանի, ոչ մի քաղաքական ուժ իրենց չաջակցեց: Ըստ նրա՝ այս իրավիճակը կարող էր մեղմել թոշակների ու աշխատավարձերի բարձրացումը, բայց փաստորեն 2015 թվականից դրանք չեն բարձրացել: «Ու կա որոշում, որ մինչև 2020 թվականը չեն բարձրանալու»,- նշել է նա: Մինչդեռ ծառուկյանականները ոչ թե փողոցային պայքար էին առաջարկում, այլ խորհրդարանական, իսկ կյանքը ցույց է տվել, որ իշխանությունները երբեք ու երբեք չեն ընկրկում այդ տիրույթում մղվող պայքարից։ Ուստի Ծառուկյան դաշինքը կարող էր ինքը դառնալ այդ պայքարի լոկոմոտիվը նույնիսկ եթե որեւէ ուժ չէր արձագանքել իրենց կոչին։ Ակնհայտ է մի բան, որ թանկացումները Հայաստանում սպառնալիք են դարձել ոչ միայն շարքային քաղաքացիների գոյությանը, այլեւ կարող են իշխանության համար դառնալ։ Մի փոքր կայծ եւ չի բացառվում մեծ հրդեհը։ Ու չի բացառվում Ծառուկյանը խորհրդարան է եկել, որպեսզի բացատրություն տա հենց այդ թեմայով՝ ըստ էության ուղղորդելով շարքերին, որ չտրվեն իր կուսակցականների հայտարարություններին, թե հազարավոր մարդիկ եթե փողոց դուրս գան, իրենք կմիանան։ Ծառուկյանը հստակ փակեց այդ թեման՝ ասելով, որ չեն միանալու, այսպիսով նա իր մեծ աջակցությունն է ցուցաբերում իշխանություններին հեռու մնալով պայքարի օջախից։ Հ․Գ․-Ի դեպ, Գագիկ Ծառուկյանը ապահովագրել է նաեւ իրեն՝ հնարավոր ֆորս մաժորներից, ասելով, որ կյանքում անփոխարինելի մարդիկ չկան՝ նկատի ունենալով ՀՀԿ-ականների պնդումները առ Սերժ Սարգսյան։ Անի Սահակյան
Հետևեք մեզ Viber-ում
