Երևի պուլտով ասել են՝ Արցախի նախագահներից մեկն էլ Երեւանում նստի. Քոչարյանը Փաշինյանի խոսքերի մասին

Հայաստանում չպետք է լինի ղեկավար, որի գլխի «հեռակառավարման վահանակը» մեկ այլ տեղում է։ Աջափնյակ վարչական շրջանի բնակիչների հետ հանդիպման ժամանակ այդ մասին հայտարարել է ՀՀ երկրորդ նախագահ, վարչապետի թեկնածու Ռոբերտ Քոչարյանը։

«Մենք՝ որպես ժողովուրդ, ունա՞կ ենք տեր կանգնել հավաքական հիշողությանը և դասեր քաղել։ Կարծում եմ՝ պետք է. Յուրաքանչյուր ոք սովորում է սեփական փորձով, բայց այն ամենը, ինչը փոխել է կյանքի հունը՝ մեծ ուրախությունները կամ վիշտը, հիշվում են։ Հարցն այն է՝ ժողովուրդը, ազգը հիշո՞ւմ է։ Ի՞նչ տեղի ունեցավ մի քանի տարի առաջ՝ 2021 թվականին։ Արցախի կորո՞ւստը։ Ավելի քան 5 հազար զոհ և 12 հազար վիրավոր։ Վստահ եմ, որ 2021-ի հունիսին հիշում էին, ընդամենը 6-7 ամիս էր անցել։ Եվ այնուամենայնիվ, հիշելով հանդերձ, մարդիկ գնացին ու քվեարկեցին Փաշինյանի օգտին, ոգևորեցին նրան Արցախը հանձնելու և հաջորդող քայլերի համար։

Մինչ օրս ես դրա բացատրությունը չունեմ։ Ըստ էության, ընտրողը Փաշինյանին հնարավորություն տվեց նոր ողբերգություն իրականացնել։ Նրան ասաց՝ «ապրե՛ս, մենք պատրաստ ենք զրկանքների, շարունակիր նույն ոգով»։ Հենց դա տեղի ունեցավ։ Իշխանությունները խոստումներ են տալիս և ստանում մանդատ դրանք իրականացնելու համար։ Փաշինյանը մանդատ ստացավ Ալիևին տված խոստումների համար։ Այլ բացատրություն չկա։ Նա, ով ծնկի է իջած, ատում է ոչ թե նրանց, ովքեր ստիպել են իրեն ծնկել, այլ նրանց, ովքեր ծնկի չեն իջել։ Դրա համար նա (Փաշինյանը) ատում է բոլորին, ովքեր պայքարում են։ Դա շատ խոր բարդույթ է՝ ի ծնե, և այդ մարդը ղեկավարում է Հայաստանը։ Դա խայտառակություն է։ Ի՞նչ անել այս ամենի հետ։ Կարծում եմ՝ գիտեք։ Լկտիությունն այնտեղ է հասել, որ ձեռք են բարձրացրել ինքնության վրա»,- նշել է քաղաքական գործիչը։

Քոչարյանը հեգնանքով ենթադրել է, որ Փաշինյանի գլխում «չիպ» կա, իսկ «հեռակառավարման վահանակը» Հայաստանում չէ։ «Դարձել է Ալիևի տուզիկը»,- պարզաբանել է նա՝ հիշեցնելով, որ հունիսի 7-ին անհրաժեշտ է անջատել այդ «հեռակառավարման վահանակը»։