Էդ որ ասում եք՝ 2.5 տոկոս գնաճ, էդ ո՞ր գինն ա չոքել մեր դռանը. Վարչապետ

«Էդ որ ասում եք՝ 2.5 տոկոս գնաճ։ Էդ ո՞ր գինն ա չոքել մեր դռանը», - հարցուպատասխանի ժամանակ հայտարարեց վարչապետ Կարեն Կարապետյանը՝ պատասխանելով գնաճի, թանկացումների վերաբերյալ ԱԺ «Ելք» խմբակցության պատգամավոր Արարատ Միրզոյանի հարցերին։ Ինչպես նշեց՝ Հայաստանն ունի արտաքին վարկերի պարտավորություններ, տնտեսությունը զարգացնելու խնդիր ու լրացուցիչ միջոցների անհրաժեշտություն. «Մենք քննարկել ենք այն բոլոր տարբերակները, որոնք մինիմալ բեռ են ստեղծում մեր քաղաքացու բիզնեսի համար։ Եթե այստեղ չանեինք, մեկ այլ տեղ պետք է անեինք»։ Վարչապետն ասաց, որ այդ թանկացումները Հարկային օրենսգրքի հետևանքով չեն, այլ պայմանավորված են միջազգային շուկայում կատարված գործընթացներով։ «Այն, ինչ շուկայում է կատարվում, դա միջազգային շուկայի արձագանքն է։ Աշխարհում կարագի գինը թանկացել է, դրա համար էլ մեզ մոտ թանկացել է։ Հայաստանը դրա դեմ ի՞նչ պետք է անի։ Մենք պետք է տնտեսական աճ ապահովենք, որպեսզի կարողանանք կոմպենսացնել», – հայտարարեց վարչապետը։