Վարչապետը՝ Իրան-Հայաստան երկաթուղու կառուցման մասին

ԱԺ-կառավարություն հարց ու պատասխանի ժամանակ վարչապետ Կարեն Կարապետյանն այսօր անդրադարձավ Հայաստան-Իրան համագործակցությանը: Ինչպես ասաց՝  նախորդ տարվա 10 ամիսներին Իրանի հետ Հայաստանի առևտրաշրջանառությունն առանց էներգետիկայի կազմել է 62.5 մլն դոլար ընդամենը: «Դա չնչին մի թիվ է՝ հաշվի առնելով Իրանի բնակչության թիվըԻրանական շուկայում ունեինք արտահանման և ներմուծման ամենաչնչին աճը: Մենք մեր իրանական բոլոր գործընկերների հետ խոսել ենք, որ այստեղ շատ-շատ անելիքներ ունենք: Այստեղ թռիչքային աճ ապահովելու շատ մեծ պոտենցիալ ունենք: Երկաթգիծը կկառուցվի, թե ոչ, կապված է այն ապրանքային հոսքերից, որոնք հնարավոր են այդ ճանապարհով իրագործել: Ես կարծում եմ, որ երկաթգիծը կառուցելն ինքնանպատակ չէ, մենք դրան կանդրադառնանք այն ժամանակ, երբ կակտիվացնենք այդ շուկան և կհասկանանք, որ որպես տրանզիտային երկիր՝ կարող ենք շարժվել առաջ»,- ասաց նա: Պատասխանելով պատգամավոր Վահե Էնֆիաջյանի հարցին՝ նշեց, որ Իրան-Հայաստան գազամուղի թողունակությունը չի մեծացվում, տրանզիտային գազամուղ չի կառուցվում. «Մենք ժամանակին շատ համարձակ քայլ ենք արել՝ այդ գազամուղը կառուցելով, մեր էներգետիկ անվտանգության ու ալտերնատիվ հարցերը լուծել ենք: Այսօր մենք ստանում ենք 350-400 մլն խմ գազ: Եթե մենք երկու անգամ ավելի տրամագծով գազամուղ կառուցեինք, դա կլիներ չորս անգամ ավելի թանկ, և եթե չունենայինք տրանզիտային հնարավորություններ, այդ գինը պետք է տրանսֆորմացնեինք սակագնի վրա: Այդ թվում կհնչեր շատ արդարացի քննադատություն՝ ինչո՞ւ եք դա կառուցել: Այդ պատճառով՝ կլինի տրանզիտային գազամուղ, թե չէ, ժամանակը ցույց կտա, հիմնական դերակատարը լինելու է գազի մատակարարը: Տրանզիտային երկիրը մաքսիմում կարող է համապատասխան պայմաններ ստեղծել, որպեսզի այն կատարվի քո երկրի տարածքում»: