Հռոմում ձերբակալել են Ուզբեկստանում Իտալիայի նախկին դեսպանին՝ ռուսներին անօրինական վիզաներ տրամադրելու համար

Հռոմում ձերբակալել են Ուզբեկստանում Իտալիայի նախկին դեսպան Պիերգաբրիելե Պապադիա դե Բոտինի դի Սանտ'Անյեզեին։ Նա մեղադրվում է ռուսներին անօրինական վիզաներ տրամադրելու մեջ, հայտնում է La Repubblica։

Երբ 2024 թվականի դեկտեմբերի 2-ին 56-ամյա Պիերգաբրիելե Պապադիա դե Բոտինի դի Սանտ Անյեզեն ստանձնել է Ուզբեկստանի մայրաքաղաք Տաշքենդում Իտալիայի դեսպանության ղեկավարի պաշտոնը, նա իր ձեռքն է վերցրել վիզաների բաժնի կառավարումը։

Մոտավորապես ամսվա կեսերին նա կազմակերպել է այդ բաժնում Տատյանա Տարականովայի նշանակումը։ Վերջինս Իտալիայի քաղաքացիություն ունեցող 53-ամյա ռուսաստանցի է, բնակվում է Բուլղարիայում և նախկինում Պապադիայի հետ աշխատել է Մոսկվայում գտնվող Իտալիայի հյուպատոսությունում։

Ներկայումս նրանք երկուսն էլ գտնվում են Հռոմի դատախազության քննության ներքո՝ ապօրինի ներգաղթին օժանդակելու և ծառայողական պարտականություններին հակասող գործողությունների մեղադրանքով։ Երեկ ֆինանսական ոստիկանությունն իրականացրել է քննչական դատավոր Աննալիզա Մարցանոյի սահմանած խափանման միջոցները։ Պապադիան ձերբակալվել է Հռոմում և կալանավորվել մինչև քննության ավարտը։ Նա իր պաշտոնից հեռացվել է դեռևս 2025 թվականի դեկտեմբերին։

Ըստ քննության տվյալների՝ Պապադիան, օգտագործելով իր օգնականին, ստեղծել է Ռուսաստանի քաղաքացիներին երկարաժամկետ զբոսաշրջային վիզաների (մեկից երեք տարի ժամկետով) տրամադրման համակարգ, նույնիսկ եթե նրանք չեն համապատասխանել Շենգենյան գոտի մուտք գործելու կանոններով սահմանված պահանջներին։

Այս ամենը իրականացվել է աստղաբաշխական գումարների դիմաց։ Մեկ անձի համար նա ստացել է 4000-ից մինչև 16000 եվրո գումար։

Ընդ որում, իրավաբանական վճարները կազմել են 45-ից 60 եվրո (յուրաքանչյուր հայտի համար)։ Պապադիան և նրա օգնականը ներդրել են նաև «VIP սակագին»։

Համակարգը լավ հղկված է եղել։ Դրանում ներգրավված են եղել մոսկովյան երեք տուրիստական գործակալություններ՝ «Happy Travel», «Visa4you» և «Park Lane», որոնք բոլորն էլ գործել են միևնույն հասցեում։ Լրատվամիջոցի տվյալներով՝ առնվազն 95 ՌԴ քաղաքացի է դիմել այս գործակալություններին և հետագայում մուտք գործել Իտալիա՝ առանց անհրաժեշտ վիզային պահանջները կատարելու։ Մասնավորապես, նրանք չեն բնակվել տվյալ հյուպատոսական տարածքում (տվյալ դեպքում՝ Ուզբեկստանում), չեն ունեցել դիմումատուի կողմից ստորագրված փաստաթղթեր (այսինքն՝ ստորագրությունը տարբերվել է անձնագրի ստորագրությունից) կամ անձամբ չեն ներկայացել հյուպատոսություն։