Ես այն մարդկանցից չեմ,որ աշխատում են «պրիազնիյով կամ նյեպրիազնիյով».Նաղդալյան

ԵԽԽՎ հայաստանյան պատվիրակության անդամ Հերմինե Նաղդալյանին  ԱԺ-ում լրագրողները հարց ուղղեցին,թե արդյոք վիրավորված չէ՞ Սերժ Սարգսյանից, քանի որ ասում են` նա է անձամբ ուզում, որ Նաղդալյանը հեռանա ԵԽԽՎ պատվիրակության կազմից: «Ով ասում է, նրանից հարցրեք»,-պատասխանեց Նաղդալյանը: «Դեռ այս խորհրդարանի ստարտի ժամանակ, երբ խորհրդարանը ընտրվեց, պայմանավորվածությունը խորհրդարանի ղեկավարության և ՀՀ նախագահի հետ եղել է այն, որ, քանի որ նոր պատվիրակություն է, և այնտեղ կան նոր մարդիկ, անհրաժեշտ է, որ փորձառուները մի փոքր ավելի երկար աշխատեն: Սա նախատեսված է նաև Եվրոպայի խորհրդի Խորհրդարանական վեհաժողովի կանոնակարգով»,- ասաց նա: «Ի սկզբանե այս խորհրդարանի ձևավորման ժամանակ մեր պայմանավորվածությունը այսպիսին է եղել, որ վեց ամսվա չափ ես այս պատվիրակության մեջ կատարելու եմ իմ աշխատանքները, զուգահեռաբար, ես նշանակվել եմ ԵԱՀԿ պատվիրակության ղեկավար, իսկ վեց ամիս հետո թողնելու եմ ԵԽԽՎ-ն և շարունակելու եմ ԵԱՀԿ-ում իմ աշխատանքները»,- շարունակեց Նաղդալյանը՝տեղեկացնելով,որ միջանցքներում հարցազրույց տալու նախասիրություն չունի: Կա՞ Արփինե Հովհաննիսյան-Հերմինե Նաղդալյան հակամարտություն,հարցրեցին լրագրողները. նա պատասխանեց. «Ես հնարովի բաների մասին խոսելու որևէ նախասիրություն չունեմ, որևէ մեկի հետ ընդհանրապես հակասություն չունեմ: Ես այն մարդկանից չեմ, որ անձնական և այլ տիպի հարաբերությունները բերում են աշխատանքային դաշտ կամ ղեկավարվում են նախասիրություններով, կամ ինչպես ինչ-որ մեկը գրել էր` «պրիազնիյով կամ նյեպրիազնիյով»: Ես այստեղ գալիս եմ աշխատանքի և աշխատում եմ: Կարծում եմ` մեզնից յուրաքանչյուրին պետք է գնահատեն մեր կատարած աշխատանքով»: