«Նոր հավեր, երկաթե ձվեր»

Հայաստանի նոր ընդդիմությունը, որը Ելք անվանումն ունի, քաղաքական դաշտում առաջին քայլերն անելիս կարծես նոր հեծանիվ էր որոշել հորինել։ Կամ ինչպես ժողովուրդը կասեր, ասպարեզ էին նետվել «նոր հավեր, որոնք երկաթե ձվեր են ածում»։ Ըստ այդմ՝ այդ ընդդիմությունը հայտարարում էր, որ տարբերվելու են նախորդներից, որ ժողովրդին հենց այնպես փողոց չեն հանելու, ինչպես նախկինները, չեն տանելու պարտության, իսկ եթե հանեն միայն այն դեպքում, եթե այդ վերաբերյալ հանրային պահանջ լինի։ Էլի շատ ու շատ «տարբերակիչ» հատկանիշների մասին էին խոսում Ելք ընկերները, սակայն կյանքը ցույց տվեց, որ քաղաքականությունը այնքան էլ հնարավորի արվեստ չէ, որտեղ կարելի է իմպրովիզներ թույլ տալ, սա մի դաշտ է, որն ունի խաղի իր կանոնները, իսկ ովքեր չեն խաղում այդ կանոններով, հայտնվում են լուսանցքում։ Ինչպես հայտնի է, «Ելք» դաշինքը նախատեսել է հունվարի 19-ին` ժամը 17:00-ին, երթ կազմակերպել ընդդեմ թանկացումների: Հրավիրված ասուլիսի ընթացքում պատասխանելով իրենց հասցեին հնչած մեղադրանքներին Նիկոլ Փաշինյանը արդարացավ, թե որ ինքը մշտապես ասել է հետևյանը՝ եթե որևէ քաղաքական ուժ քաղաքացիներին փողոց է հրավիրում, պետք է հստակ ասի, թե որն է դրա նպատակը, որոնք են հետագա քայլերը: «Այն պահին, երբ ՀՀ տասնյակ հազարավոր քաղաքացիներ կարտահայտվեն այս պահանջի օգտին, մենք ժողովրդի հետ գալու ենք Ազգային ժողով և այդ ժողովրդի անունից առաջարկելու ենք Ազգային ժողովին, որ խորհրդարանական մեծամասնությունը և բոլորս հրապարակային պարտավորություն ստանձնենք, որ արագ ձևով Հարկային օրենսգրքում կանենք այնպիսի փոփոխություններ, որոնք կկասեցնեն թանկացումները: Եթե ՀՀ տասնյակ հազարավոր քաղաքացիներ այդ պահանջը ներկայացնեն, ես կարող եմ երաշխավորել, որ Հարկային օրենսգրքում այդ փոփոխությունները կկատարվեն, քանի որ իշխանությունների կողմից այդ պահանջն արհամարելը կարող է բերել քաղաքական իրավիճակի փոփոխության»,- նշեց նա: Իսկ երթ անցկացնելու հանրային պահանջի մասին էլ մի քանի անհաջող «կրուտիտից» հետո նահանջեց իր՝ ժամանակին հնչեցրած մտքերից, ասելով, որ նաեւ քաղաքական ուժերը պետք է նման պահանջ իջեցնեն։ Մի բան ակնհայտ է եւ այդ մասին բարձրաձայնել են նաեւ քաղաքական այլ գործիչներ, որ Ելք-ի որդեգրած մարտավարությունը այնքան է հեղինակազրկել այս ուժին, որ վերջինները ապավինում են փողոցային պայքարին, որպեսզի վերականգնեն սեփական վարկանիշը։ Պարզ ասած՝ Հայաստանում ոչ միայն իշխանությունն է պատեհապաշտ, այլեւ ընդդիմությունը, որն առաջնորդվում է բացառապես սեփական շահերից ելնելով։ Ելք-ը բացառություն չէ, Ծառուկյան դաշինքը նունպես կարող է մի քանի գույն փոխել, եթե դա պահանջում է սեփական շահը։ Հիշեցնենք, որ քաղաքական ուժերն արդեն առիթ ունեցել էին հայտարարելու, որ չեն պատրաստվում աջակցել «Ելքին»: Դրանց թվում էր նաև «Ծառուկյան» դաշինքը: Վերջիններս ասում էին, որ դա որեւէ օգուտ չի տա։ Ահա մի քանի օր անց «Ծառուկյան» դաշինքի վերաբերմունքը շեշտակի փոխվում է։ Այսօր արդեն նրանք ոչ միայն չեն փնովում «Ելքի» գործողությունները, այլև նույնիսկ հայտարարում են, որ պայքարի ցանկացած ձև՝ թանկացումների և կառավարության անարդյունավետ կառավարման դեմ, արդարացված է: Սերգեյ Բագրատյանը նաև ասում է. «Եթե տեսնենք հարյուր հազարավոր մարդիկ դուրս գան փողոց, կմիանանք»: Քաղաքական շրջանակներում ծառուկյանականների վերաբերմունքի փոփոխությունը բացատրում էին նրանով, որ ՀՀԿ-ն ապրիլից հետո էլ շարունակելու է կառավարումը ՀՅԴ-ի հետ ու չի պատրաստվում Ծառուկյան դաշինքի հետ կոալիցիա կազմել։ Չի բացառվում, որ Ծառուկյան դաշինքը միանա Ելք-ի նախաձեռնած պայքարին՝ հանուն իրեն, որպեսզի իշխանություններին ինչ-որ բան հասկացնի։ Անի Սահակյան