Անընդհատ գովերգեք Սերժ Սարգսյանին, որովհետև ձեզ նկարահանում են թաքնված տեսախցիկով.Փաշինյան

«Հայաստանի ոստիկանության երազանքն է տեսախցիկներ տեղադրել ցանկացած վայրում և այդ երազանքը ամրագրել է խորհրդարանին ներկայացված «Ոստիկանության մասին» օրենքի նախագծում։ Օրենքի նախագիծը նախատեսում է ոչ միայն հանրային վայրերում տեսանկարահանում իրականացնել, այլ նաև՝ մասնավոր վայրերում։ Ասենք, կարող են գնալ մասնավոր մի վայրում որևէ մեկի դիմացի հարևանի հետ պայմանագիր կնքեն ու տեսախցիկ տեղադրեն և ձեզ պահեն ընդհանուր տեսադաշտում։ Ընդ որում՝ խոսքը գնում է ինչպես հրապարակային, այնպես էլ գաղտնի նկարահանման մասին», -   նախագծի քննարկման ժամանակ   հայտարարեց Նիկոլ Փաշինյանը։ Ինչո՞ւ է համատարած տեսախցիկների տեղադրումը կառավարության համար համարվում անհետաձգելի հարց, որը շատ արագ ներկայացվել է խորհրդարան, այսօր առավոտյան դրական եզրակացություն ստացել ԱԺ Պաշտպանության, անվտանգության հարցերի մշտական հանձնաժողովում ու այժմ քննարկվում է լիագումար նիստում։ «Իշխանությանը պետք են երաշխիքներ՝ ոչ միայն իմանալու, թե էս հատվածի  պատգամավորները ինչ են անում, այլև այս հատվածի  պատգամավորներն ինչ են անում։ Չմտածեք, թե միայն մեր օֆիսների, տների, ավտոների մեջ են կախելու այդ կամերաները, այլ ձեր վրա էլ են կախելու։ Այնպես որ, մեծամասնության ներկայացուցիչներ, ժպտացեք և անընդհատ գովերգեք Սերժ Սարգսյանին, որովհետև ձեզ նկարահանում են թաքնված տեսախցիկով», -  հայտարարեց պատգամավորը։