Այդ անձինք չեն կարող ազատվել վաղեմության ժամկետների կիրառման հիմքով. Վարդապետյանը՝ «Մարտի 1»–ի գործի մասին

Հայաստանի Հանրապետության դատախազության 2025 թվականի գործունեության մասին հաղորդման եզրափակիչ ելույթում ԱԺ-ում ՀՀ գլխավոր դատախազ Աննա Վարդապետյանը համառոտ անդրադարձավ հնչած հարցերին և հարցադրումներին:

Պատասխանելով ընդդիմադիր պատգամավոր Արթուր Խաչատրյանի՝ Մարտի 1-ի վերաբերյալ հարցադրումներին՝ Վարդապետյանը նկատեց՝ իրեն թվում էր՝ Մարտի 1-ի մասով այլևս նրա հետ չի խոսի, բայց սա հնարավորություն է՝ ԱԺ ամբիոնից վերահաստատելու այն, ինչ ասել է Պետաիրավական հարցերի հանձնաժողովի նիստում:

Կարդալով դատարանի որոշումները՝ Վարդապետյանը նկատեց՝ դատարանն արձանագրել է, որ Մյասնիկյանի արձանի մոտ հավաքված մարդկանց հավաքը տեղի է ունեցել ինքնաբուխ և անկազմակերպ զարգացումների հետևանքով:

«Մինչեռ ավելի վաղ Ազատության հրապարակից ցուցարարներին ցրելը,- հիշեցնեմ՝ այս մասով մենք արդեն դատարան ուղարկած մեղադրանքներ ունենք և առաջիկայում էլ ենք ունենալու, այդ թվում՝ դրա կոպիտ բնույթը, ինչպես նաև նույն օրը տեղի ունեցած մի շարք այլ նմանատիպ կամ անվերահսկելի իրադարձություններ,- հնարավոր է, որ դեր են խաղացել բռնության հետագա սրման գործում՝ ի հակադրություն նախապես պլանավորված և կազմակերպված անկարգության կամ հեղաշրջման փորձի:

Չի՛ եղել Կառավարության պնդումները հաստատող որևէ համոզիչ ապացույց, որ տարածքում բռնություն գործադրած ցուցարարները զինված են եղել ոչ թե ինքնաշեն առարկաներով, այլ հրազեններով, ինչպես նաև որևէ ապացույց, որը կհաստատեր, որ մահերն առաջացել են ցուցարարների կողմից դիտավորությամբ կամ նույնիսկ անզգուշությամբ իրականացված գործողությունների արդյունքում...

Դատարանը եզրակացրել է, որ արցունքաբեր գազի, նռնակների օգտագործման վերաբերյալ պարզ, մանրամասն և պարտադիր հրահանգների բացակայությունը, համապատասխան պատրաստվածության և վերահսկողության բացը, ինչպես նաև արցունքաբեր գազի, նռնակների վիճակի և գործադրման հետ կապված վերոնշյալ խնդիրը որոշակի չափով նպաստել են այդ ամբոխի վերահսկման համար նախատեսված զենքերի ոչ պատշաճ գործադրմանը (խոսքը չերյոմուխաների մասին է)՝ անվտանգության կանոնների կիրառմամբ, ինչի հետևանքով վրա է հասել 3 անձի մահ:

Նույն վճռի 27-227-րդ կետում դատարանը կասկածից վեր է համարել, որ հրազենի միջոցով պատճառված մյուս 5 անձանց մահերը վերագրելի են պետությանը»,- ասաց ՀՀ գլխավոր դատախազը:

Նրա խոսքով՝ Եվրոպական դատարանը միայն Մարտի 1-ի գործով մի շարք վճիռներ ունի: «Ֆարմանյանը և այլք ըննդեմ Հայաստանի», մինչ այդ՝ «Մուշեղ Սաղաթելյանն ընդդեմ Հայաստանի», «Մյասնիկ Մալխասյանն ընդդեմ Հայաստանի», «Դարեսկիզբ» ՍՊԸ-ն ընդդեմ Հայաստանի, «Վիրաբյանն ընդդեմ Հայաստանի» գործերով կայացված վճիռներով դատարանը ձևավորել է կայուն դիրքորոշում այն մասին, որ այս հանցագործությունները կապված են պաշտոնատար անձանց կողմից բռնությամբ զուգորդված լիազորությունների անցման հետ, որի դեպքում առկա է վաղեմության ժամկետներ կիրառելու օրենսդրական արգելք:

«Եթե թարգմանենք սա ավելի պարզ լեզվով, սա նշանակում է՝ անձինք, որոնք մեղադրվում են այս հանցագործությունների մեջ, չեն կարող քրեական պատասխանատվությունից ազատվել վաղեմության ժամկետների կիրառման հիմքով»,- ասաց գլխավոր դատախազը:

Պատասխանելով ՔՊ խմբակցության պատգամավոր Անդրանիկ Քոչարյանի հայտարարությանը, թե բանակային կորպուսների դրվագները ստվերում են մնացել, ընդգծեց՝ ստվերում չեն մնացել:

«Բանակային կորպուսների հետ կապված քննությունն այս պահին բավական ակտիվ դերակատարում ունի, և Պաշտպանության բանակն էլ, եթե գիտեք, Բանակային կոչրպուսներից մեկն էր և այդ կարգավիճակն ուներ»,- նշեց նա: