Արսեն Թորոսյանը չարաչար սխալվում է. Ադրբեջանը Արցախում չի կարող անել այն, ինչ ուզում է
Արցախում Ադրբեջանի կողմից հայկական հոգևոր-պատմամշակութային հուշարձանների ոչնչացումը վկայում է իրենց կողմից հստակ մշակված, հետևողական ցեղասպանական գործողությունների մասին, որը ոչ միայն չի քննադատվում ՀՀ իշխանության կողմից, այլ նաև` խրախուսվում է: 24News-ի հետ զրույցում նման կարծիք հայտնեց Արցախի Հանրապետության նախկին պետնախարար, նախկին ՄԻՊ Արտակ Բեգլարյանը։
«Փաշինյանն ասում է, որ իրենք ոչինչ չեն անելու, իսկ իր թիմակից Արսեն Թորոսյանն ասումէ, թե բա իրենց տարածքն է, ինչ ուզում են, անում են: Արսեն Թորոսյանը, մեղմ ասած, հանցավոր կերպով ու չարաչար սխալվում է, որովհետև միջազգային իրավունքը և համամարդկային սկզբունքները ենթադրում են, որ պետությունը իր տարածքում չի կարող անել ինչ ուզում է, անգամ եթե, ինչպես ՀՀ իշխանությունն է հայտարարում՝ Արցախը Ադրբեջանի տարածք է»:
Հիշեցնենք, որ ադրբեջանցիները քանդել են Ստեփանակերտի Մայր Տաճարն ու Սուրբ Հակոբ եկեղեցին: Արցախի սիմվոլներից՝ «Մենք ենք, մեր սարքերը» հուշարձանը ևս քանդման վտանգի առաջ է:
Արտակ Բեգլարյանը հիշեցրեց, որ մշակութային ժառանգությունը քանդելը միջազգային հանցագործություն է, Ադրբեջանը հանցանք է գործում, իսկ ՀՀ-ն դրանք պաշտպանելու պարտավորություն ունի՝ սկսած հայկական ժառանգության հանդեպ ունեցած պատասխանատվությունից, մինչև այն, որ արցախցիներին ընդունած կողմն է, հետևաբար նրանց մշակույթը պիտի պաշտպանի:
«Միջազգային ատյաններում Ադրբեջանի դեմ հայցեր կան, նա պարտավորություններ ունի, այդ թվում պիտի պահպանի այդ ժառանգությունը, իսկ ՀՀ-ն պիտի հետևողական լինի, բայց, արի ու տես, որ, իրենք հայտարարություններով մի բան էլ խրախուսում ու աջակցում են Ադրբեջանի ցեղասպանական քաղաքականությանը»։
Հետևեք մեզ Viber-ում
