Էքս քաղաքապետը «սաղ խառնել է իրար»

Հրապարակ օրաթերթը գրում է. Ամեն տարվա պես այս տարի նույնպես հունվարի 13-ին Ապարանում նշեցին հին տոմարով Նոր տարին, որին մասնակցել են «Նիգ Ապարան» հայրենակցական միությունը՝ ի դեմս նաեւ ՀՀ քննչական կոմիտեի նախագահ Աղվան Հովսեփյանի, տարբեր մարզերի ներկայացուցիչներ եւ բարձրաստիճան այրեր, մասնավորապես՝ ԱԺ ՀՀԿ խմբակցության ղեկավար Վահրամ Բաղդասարյանը, Թունելի Հակոբը՝ աղքատության մեծ մասնագետ Հակոբ Հակոբյանը, բնապահպանության նախարար Արծվիկ Մինասյանը եւ այլք: Միջոցառումն սկսվել է հոգեւոր հայրերի օրհնությամբ, ելույթ է ունեցել Ապարանի նախկին համայնքապետ, այժմ համայնքի ղեկավարի տեղակալ Գոռ Աբրահամյանը (գործող համայնքապետը, ըստ լուրերի, ներկա չի եղել միջոցառմանը): Աղվան Հովսեփյանի կողմից մշտապես հովանավորվող Գ. Աբրահամյանը, ով անցած ՏԻՄ ընտրություններում չդրեց իր թեկնածությունը, այնքան է խառնվել իրար, որ ներկաներին ուղղված շնորհավորական մաղթանքում շփոթել է տարին եւ մաղթել, որ 2008 թվականը (2018-ի փոխարեն) լինի սիրո, հավատի, բարության տարի: Փոխքաղաքապետը մաղթել է նաեւ՝ «նեցուկ լինենք հայրենի կառավարությանը, մեր երկրի նախագահին, որպեսզի կարողանանք համատեղ ուժերով հաղթահարել առկա դժվարությունները, շենացնել մեր երկիրը»: Միջոցառման մասնակիցներն այս տարի նույնպես խմբվել են տեառնընդառաջի օրը վառվող խարույկ հիշեցնող հսկայական կրակի շուրջը եւ, ձեռք ձեռքի տված, պարել հայտնի շուրջպարը: Խարույկը վառելու պատիվը վերապահվել է միանգամից երկու մարզպետի՝ Արագածոտնի մարզպետ Աշոտ Սիմոնյանին եւ Շիրակի մարզպետ Արթուր Խաչատրյանին, երկուսն էլ՝ դաշնակցական: Միջոցառումը, բնականաբար, ուղեկցվել է հյուրասիրությամբ, մեկը մյուսից ճոխ կենացներով եւ, իհարկե, կենացները քաղցրացնող դհոլ-զուռնայի հնչյուններով: