ՌԴ ՆԳՆ-ն քաղաքացիներին խորհուրդ է տալիս չբացել ՌԴ ազգային դոմենային տիրույթից դուրս գտնվող հղումները

Ռուսաստանի ներքին գործերի նախարարությունը խորհուրդ է տալիս չսեղմել ՌԴ ազգային դոմենային տիրույթից դուրս գտնվող հղումների վրա, ինչպես նաև խուսափել այն հղումներից, որոնք ունեն իրական հասցեն քողարկելու նշաններ, որպեսզի բջջային հեռախոսները և այլ սարքերը չվարակվեն վնասակար ծրագրերով, որոնք մուտք են ապահովում խարդախների համար, հայտնում է ՏԱՍՍ-ը։

«Բջջային սարքերի վրա վնասակար ծրագրերի տեղադրումը կանխելու նպատակով օգտատերերին խորհուրդ է տրվում չանցնել կասկածելի ծագում ունեցող հղումներով, այդ թվում՝ իրական հասցեն քողարկելու նշաններ ունեցող (հղումների կարճացման ծառայությունների օգտագործում)»,- գործակալության հարցմանն ի պատասխան հայտնել են ՌԴ ՆԳՆ մամուլի կենտրոնից։

Այնտեղ նաև հորդորել են չբացել այն հղումները, որոնք տեղակայված են ՌԴ ազգային դոմենային տիրույթից (.ru) դուրս գտնվող դոմենային անունների վրա, մասնավորապես՝ ընդհանուր օգտագործման գոտիներում (.site, .xyz, .click, .top, .link և նմանատիպ այլն), այդ թվում՝ մեսենջերի պաշտոնական վեբ տարբերակը նմանակող հղումները։

Դրանք բացելիս գոյություն ունի չարագործների կողմից հաշվին չարտոնված մուտք ստանալու ռիսկ՝ մուտքային տվյալները (հեռախոսահամար և գաղտնաբառ) ներմուծելու դեպքում։ Դա կարող է հանգեցնել հաշվի օգտագործմանը հակաիրավական նպատակներով։

Բացի այդ, ՆԳՆ-ն խորհուրդ է տալիս չբացել և չգործարկել այնպիսի գործարկվող ֆայլեր, որոնց ձևաչափը չի համապատասխանում հայտարարված բովանդակությանը կամ ունի օգտատիրոջը խաբելու նշաններ։

Օրինակ՝ այնպիսի ֆայլեր, ինչպիսիք են «Список.apk», «Фото.apk», «Видео.apk», «Документ.apk» և նմանատիպ այլ անվանումներով ֆայլերը, որտեղ .apk ընդլայնումը մատնանշում է Android հարթակի համար նախատեսված հավելվածի տեղադրման փաթեթը, այլ ոչ թե պատկերի, տեսանյութի կամ տեքստային փաստաթղթի ֆայլ։ «[Պետք է] ուշադրություն դարձնել նույնիսկ ծանոթ կոնտակտներից ստացված հաղորդագրություններին, որոնք պարունակում են հղումներ կամ գործարկվող ֆայլեր»,- նշել են գերատեսչությունում։

Նման հաղորդագրություններ ստանալիս ավելի լավ է հեռախոսով կապ հաստատել ուղարկողի հետ՝ հաղորդագրությունն ուղարկելու փաստը հաստատելու համար։ Դա թույլ կտա բացահայտել հնարավոր հակաիրավական գործողությունները տվյալ մարդու նկատմամբ, որն ինքը կարող էր դառնալ խարդախների զոհը։