Կողմերը գիտեն, թե ինչ են մտածում համանախագահները.Լավրովը՝ԼՂ հիմնախնդրի մասին
«Լեռնային Ղարաբաղի հիմնախնդրի կարգավորումը կողմերի ձեռքում է: ՌԴ-ն չի կարող հստակ պլաններ ունենալ Լեռնային Ղարաբաղի հակամարտության կարգավորման համար, քանի որ խնդիրը պետք է լուծեն հակամարտող կողմերը: Որպես ԵԱՀԿ Մինսկի խմբի համանախագահներ Ռուսաստանը Միացյալ Նահանգների և Ֆրանսիայի հետ անում է ամեն բան կարգավորման համար անհրաժեշտ պայմաններ ստեղծելու նպատակով»,- տարեկան ամփոփիչ ասուլիսի ժամանակ հայտարարեց Ռուսաստանի Դաշնության արտաքին գործերի նախարար Սերգեյ Լավրովը՝ ընդգծելով, որ կողմերից դրական ազդակներ են սպասվում ԵԱՀԿ Մինսկի խմբի համանախագահների առաջարկների առնչությամբ, որոնք կողմերի մոտ են: Արտգործնախարարն ընդգծեց, որ վերջին տարիներին ձեռնարկվել են ինտենսիվ ջանքեր՝ ամփոփելով հակամարտող կողմերի բոլոր դիրքորոշումները և փորձելով դրանցից առանձնացնել ԼՂ խնդրի կարգավորման այս կամ այն ասպեկտի վերաբերյալ համընկող մոտեցումները: «Այս աշխատանքն իրականացվել է ինտենսիվորեն: Անցնող տարում համանախագահների արած բոլոր առաջարկները, իսկ համանախագահներն ընդհանուր մոտեցումներ ունեն այս հարցում, գտնվում են կողմերի մոտ: Կողմերը գիտեն, թե ինչ են մտածում համանախագահները, սակայն հենց նրանք պետք է որոշում կայացնեն: Իհարկե, մենք սպասում ենք, որ դրական ազդակներ կհաջորդեն երկու կողմերից էլ»,- ասաց Լավրովը: Անցնող 2017 թվականին տեղի ունեցան Հայաստանի և Ադրբեջանի նախագահների ու արտաքին գործերի նախարարների հանդիպումներ,ասաց նա և հիշեցրեց, որ համանախագահ երկրների ներկայացուցիչները մասնակցել են այս գործընթացներին: «Կարծում եմ, որ հիմա կարևոր է հավելյալ քայլեր ձեռնարկել, որպեսզի շփման գծում ավելի հանգիստ լինի »,- հայտարարեց ՌԴ արտգործնախարարը:
Հետևեք մեզ Viber-ում
