Թրամփը հայտնել է ՆԱՏՕ-ի կազմից դուրս գալու մտադրության մասին. Telegraph

Միացյալ Նահանգների նախագահ Դոնալդ Թրամփը «լրջորեն դիտարկում է» ՆԱՏՕ-ի կազմից ԱՄՆ-ն դուրս բերելու հարցը։ Ինչպես հաղորդում է «Արմենպրես»-ը, այս մասին նա խոսել է բրիտանական Daily Telegraph-ին տված հարցազրույցում։Թերթը գրում է, որ Թրամփը դաշինքն անվանել է «թղթե վագր» և պնդել, որ Մեծ Բրիտանիան նավատորմ չունի։Հարցին, թե արդյոք Մերձավոր Արևելքում հակամարտությունից հետո նա կվերանայի՞ ԱՄՆ-ի անդամակցությունը դաշինքին, Թրամփը պատասխանել է. «Այո, ես կասեի, որ դա վերանայման ենթակա չէ… ՆԱՏՕ-ն ինձ համար երբեք համոզիչ չի եղել։ Ես միշտ գիտեի, որ նրանք «թղթե վագր» են, և, ի դեպ, Պուտինը նույնպես գիտի դա»։Խոսելով Մեծ Բրիտանիայի ռազմանավերի մասին՝ ԱՄՆ նախագահն ասել է․ «Դուք նույնիսկ նավատորմ չունեք։ Դուք չափազանց հին եք և ունեցել եք ավիակիրներ, որոնք չեն աշխատել»։

ԱՄՆ-ի հարաբերությունները ՆԱՏՕ-ի անդամ մի շարք երկրների հետ լարվել էին այն բանից հետո, ինչ այդ երկրները հայտարարել էին, որ չեն պատրաստվում որևէ կերպ ներքաշվել Իրանի դեմ ամերիկա-իսրայելական պատերազմում։ Նրանք արգելել էին Իրանի դեմ գործողություններում օգտագործել իրենց օդային տարածքը՝ հայտարարելով, որ այդ պատերազմն իրենց չի վերաբերում։Նախօրեին ՆԱՏՕ-ի հետ հարաբերությունները վերանայելու մասին խոսել էր նաև ԱՄՆ պետքարտուղար Մարկո Ռուբիոն։

Նշելով, որ վերջնական որոշումը պատկանում է նախագահին՝ Ռուբիոն մանրամասնել էր․«Ես կարծում եմ, որ, ցավոք, մենք ստիպված ենք լինելու ուսումնասիրել՝ արդյոք այս դաշինքը, որը որոշ ժամանակ լավ է ծառայել այս երկրին, դեռևս ծառայում է իր նպատակին, թե՞ այժմ այն ​​դարձել է «միակողմանի փողոց», որտեղ Ամերիկան ​​պարզապես կարող է պաշտպանել Եվրոպան, բայց երբ մենք կարիք ունենանք մեր դաշնակիցների օգնությանը, նրանք մեզ զրկելու են բազաներ տեղակայելու իրավունքից և իրենց օդային տարածքով թռիչքներից»։