Փաշինյանին չի հաջողվում ստանալ «մեկ ճակատ», ինչը նա դիտում է առավել խնդրահարույց․ ընդդիմության առաջատար ուժերին պետք է մնալ իրենց հունի մեջ․ Հակոբ Բադալյան

Վարչապետ Փաշինյանը Մոսկվա մեկնելուց առաջ «ուղերձ» է հղում ընդդիմադիր ուժերին, մասնավորապես առաջատար ընկալվող երեքին՝ Կարապետյան, Քոչարյան, Ծառուկյան: Այս մասին գրել է քաղաքական մեկնաբան Հակոբ Բադալյանը։

«Ընդ որում, Փաշինյանը դարձյալ դիմում է այսպես պետության ղեկավարին անհարիր ոճով ու հռետորաբանությամբ: Սա արդեն հասկանալի է, նա խաղում է իր էլեկտորատի վրա, իսկ էլեկտորատը «վարժեցված» է այդ ոճին:

Այլ, առավել լրջմիտ ոճը Նիկոլ Փաշինյանի էլեկտորատի մոտ չի առաջացնում անհրաժեշտ էներգետիկա: Մյուս կողմից, Նիկոլ Փաշինյանն անհրաժեշտ «էներգետիկա» չի ստանում ընդդիմադիր այդ երեք ուժերից: Նրանք կարծես թե «չեն նկատում» Նիկոլ Փաշինյանի «դիմումները», շարունակելով իրենց գործողությունների այն տրամաբանությունը, որ կառուցել են տեւական ժամանակ:

Նիկոլ Փաշինյանին չի հաջողվում ստանալ «մեկ ճակատ», ինչը նա դիտում է առավել խնդրահարույց: Սա նշանակում է, որ ընդդիմության առաջատար ուժերին պետք է մնալ իրենց հունի մեջ, դուրս չգալ հունից՝ բառի թե բուն, թե պատկերավոր իմաստով: Մյուս կողմից սակայն, դա իհարկե բավարար չէ ինքնին: Հանրային շերտերը բազմազան են, եւ այստեղ իհարկե պահանջվում է բավականին տարբերակված աշխատանք այդ շերտերի հետ:

Ինքնին այն, որ իրավիճակը կարող է չգնալ Նիկոլ Փաշինյանի ակնկալած սցենարով, դեռ չի նշանակում, որ գնում է ընդդիմության համար միարժեք շահեկան ու արդյունավետ սցենարով: Հարկ է պարզապես արձանագրել, որ մեկնակետային, ելակետային իմաստով իրավիճակը՝ որքան էլ առերեւույթ թվում է Նիկոլ Փաշինյանի գծած սցենարի ազդեցության ներքո, գործնականում առավել բարենպաստ է ընդդիմադիր ուժերի աշխատանքի համար:

Ըստ այդմ ինտրիգն այն է, թե նրանք որքան համարժեք եւ արդյունավետ կօգտագործեն այդ միջավայրը: Կամ, ավելի շուտ թերեւս՝ որքան ավելի դինամիկա եւ ինտենսիվություն կհաղորդեն արդյունավետությանը, որովհետեւ այն անկասկած կա, եւ հարցը դինամիկան ու տեմպը ապահովելն է: Սա զգում է նաև Նիկոլ Փաշինյանը, ու դա է նաեւ պատճառը, որ ձգտում է փոխհատուցել իրավիճակը հենց տեմպի հարցում առաջ անցնելով»,-գրել է նա: