Արտակարգ իրավիճակ Գեղարքունիքում

Գեղարքունիքի մարզում ձյան տեղումների պատճառով այս գիշեր Մարտունի-Գետափ ավտոճանապարհի 18-րդ կմ-ի մոտակայքում ձյան մեջ արգելափակված Opel Vectra եւ VAZ 2107 մակնիշի 2 մեքենաների վարորդներն ու ուղեւորները 2 ժամ անցկացրել են ԱԻՆ Գեղարքունիքի մարզային փրկարարական ջոկատում: Այս մասին «Հայկական Ժամանակ»-ի հետ զրույցում հայտնեցին Արտակարգ իրավիճակների նախարարության հասարակայնության հետ կապի եւ լրատվության վարչությունից: Մեքենաների արգելափակման մասին ահազանգը ստացվել է ժամը 02:25-ին, արգելափակումից մեքենաները հանվել են 04:15-ին: Իսկ մինչ այդ, մեքենաներից 6 հոգի՝ 2 վարորդ ու 4 ուղեւոր, որոնք բոլորը չափահասներ են եղել, մնացել են փրկարարական ջոկատի մասնաշենքում: Իսկ ավելի վաղ՝ ժամը 18:56-ին, ահազանգ է եղել, որ «ՈՒԱԶ» մակնիշի ավտոմեքենան Գեղարքունիքի մարզի Գավառ քաղաքի «Սուրբ խաչ» կոչվող տարածքում արգելափակվել է ձյան մեջ, այս մեքենան արգելափակումից հանվել է 20:03-ին: