24.300 քմ-ից մինչև 200.000 քմ ասֆալտապատում. մայրաքաղաքի անվերջ փոսերն ու դրանց համար ծախսված գումարները

2025 թվականին Երևանի մոտ 120 փողոցներում իրականացվել են 200.000 քմ փոսային նորոգման, 8 փողոցներում՝ միջին նորոգման աշխատանքներ: Այս մասին հայտոնւմ են Երևանի քաղաքապետարանից «Փաստինֆո»-ի գրավոր հարցմանն ի պատասխան։

Քաղաքապետարանից նշել են, որ նույն ժամանակահատվածում միջին նորոգման համար վճարվել է 1 միլիարդ 553 միլիոն 210 հազար 801 դրամ ինչը համարժեք է 3.8-4 միլիոն դոլարի, փոսային նորոգման համար՝ 1 միլիարդ 76 միլիոն 638 հազար 150 դրամ, ինչը համարժեք է 2.6-2.8 միլիոն դոլարի:
«Փաստինֆո»-ն պարբերաբար անդրադառնում է, թե այս տարի որքան գումար է ծախսվում Երևանում փոսային նորոգումների, փողոցներում միջին նորոգումների համար, իսկ ավելի վաղ անդրադարձել էինք, թե ովքեր են այն հիմնական կապալառուները, որոնց տրամադրվում են միլիոնավոր դրամներ այդ աշխատանքների համար։

Ինչ վերաբերում է 2024 թվականին, ապա քաղաքապետարանից նշել են, որ շուրջ 45 փողոցներում իրականացվել է 168.750 քմ փոսային նորոգման աշխատանք, միջին նորոգում է իրականացվել 43 փողոցում, իսկ 2023 թվականին իրականացվել է 24.300 քմ փոսային նորոգման աշխատանք, միջին նորոգում է իրականացվել 50 փողոցում: Թե որքան գումար է ծախսվել 2023 և 2024 թվականներին այդ աշխատանքների համար՝ քաղաքապետարանը չի նշել, այլ հորդորել է համապատասխան պայմանագրերին գնբարավոր է ծանոթանալ պետգնումների պաշտոնական կայքում։

Հետաքրքրվել էինք, թե ասֆալտապատման աշխատանքների ծավալը տոկոսային ցուցանիշներով որքան է կազմել ամբողջ մայրաքաղաքում, սակայն քաղաքապետարանից հայտնել են, որ ասֆալտապատման աշխատանքները տոկոսային ցուցանիշներով չեն հաշվարկվում:
Քաղաքապետարանի ներկայացրած տվյալներից կարելի է ենթադրել, որ նախորդ տարիներին կատարված աշխատանքները այդքան էլ որակյալ չեն եղել, քանի որ ոչ միայն ավելացել է փողոցների թիվը, որոնցում իրականացվել են փոսային նորոգման աշխատանքներ, այլ քմ-ն է ավելացել։

Հավելենք, որ «Փաստինֆո»-ն քաղաքապետարանից հետաքրքրվել էր, թե որ փողոցներում են աշխատանքներ կատարվել, սակայն այս հարցը մնացել է անպատասխան։ Այս հանգամանքը շատ հարցեր է առաջացնում։ Ստացվում է, որ քաղաքապետարանը ինքն է թաքցնում է իր իսկ աշխատանքները, որոնք գուցե չեն արվել, սակայն դրանց համար տարբեր չափի գումաներ են դուրս գրվել։
Պետբյուջեի գումարները ծախսվում են կա՛մ անորակ ասֆալտապատման համար, կա՛մ չարված աշխատանքների համար։