Մի կին բարկացած դժգոհեց Արսեն Թորոսյանից
Քաղաքացիները, օգտվելով Փաշինյանի քարոզարշավից, մոտենում են իրենց խնդիրներով։ Մի տղամարդ դիմել է որդու բնակարանային հարցով, իսկ մի կին, մատ թափ տալով Արսեն Թորոսյանի ուղղությամբ, բարձրաձայնել է առողջապահական խնդիր։
«Երեք տղա ունեմ, որոնցից մեկը 44-օրյա պատերազմի մասնակից է։ Մի խնդրանք ունեմ՝ թեկուզ պաշտպանության նախարարության միջոցով լուծվի բնակարանային հարցը։ Ծանրաբեռնված ընտանիք ենք, մեզ վարկ չեն տրամադրում, որպեսզի կարողանանք բնակարան ձեռք բերել։ Բնակարանների գները բարձր են»,- նշել է քաղաքացին։
Քաղաքացին հավելել է, որ ունի մեծ ընտանիք և բիզնեսի համար վերցրած վարկ, ինչի պատճառով որդին չի կարողանում հիպոթեքային վարկ ստանալ․ նրան համարում են ծանրաբեռնված։ Նրա խոսքով՝ որդին զինծառայող է։
Փաշինյանը պատասխանել է, որ նման նամակները վերահասցեավորում են համապատասխան կառույցներին, սակայն եթե քաղաքացին չի կատարում վարկային պարտավորությունները, իրենք չեն կարող նրա փոխարեն պատասխանատվություն կրել։ Քաղաքացին խնդրել է ընդունել որոշում, որից կկարողանա օգտվել իր զինվորական որդին։ Փաշինյանը խոստացել է հարցով հետաքրքրվել, եթե քաղաքացին տրամադրի անձնական տվյալները։
Մի այլ կին էլ բողոքել է առողջապահական ոլորտից՝ դժգոհության որպես աղբյուր մատնանշելով Արսեն Թորոսյանին։ Մատ թափ տալով նրա ուղղությամբ կինն ասել է, որ նա չպետք է լինի նախարար։
Փաշինյանը հետաքրքրվել է խնդրի էությամբ, ինչին կինը պատասխանել է, որ թիվ 19 պոլիկլինիկայում կեղծել են իր բնակության հասցեն և որդու հիվանդության ախտորոշումը։ Նրա խոսքով՝ միջազգային ֆինանսական աջակցությունը, որը նախատեսված էր իր որդու և աղջկա համար, պոլիկլինիկայում կեղծիքով յուրացվել է։
«Կարո՞ղ եք արդյոք մի բան անել։ Տղայիս մի աչքը չի տեսնում, մյուսն էլ կուրանում է։ Ասում եմ՝ տվեք իր ախտորոշումը, թիվ 19 պոլիկլինիկայում ասում են՝ խուլ-համրություն, բայց նա երեք տարեկանից հոգեբույժի հսկողության տակ է եղել։ Ես նրա օրինական ներկայացուցիչն եմ, բայց այդ տվյալները չեն ցույց տալիս, որովհետև դեղեր են ստանում։ Քննիչից ու դատախազությունից նույնպես մերժում եմ ստանում»,- ասել է կինը։
Նա տեղում դիմել է առողջապահության նախարար Անահիտ Ավանեսյանին՝ հետաքրքրվելով՝ արդյոք տեղյա՞կ է խնդրից։ Կինը, մեղադրելով թիվ 19 պոլիկլինիկային մի քանի ամբուլատոր քարտ պահելու և դեղերը յուրացնելու մեջ, ընդգծել է, որ իրեն ոչ մի տեղ չեն հավատում՝ ոչ դատախազությունում, ոչ ոստիկանությունում։
«Ես ամիսը 25,000 դրամի դեղեր եմ գնում։ Ամուսինս Ձեզ նամակ է փոխանցել, Դուք ցույց եք տվել, որ ստացել եք, բայց ոչ մի գործ չի արվել»,- ասել է կինը Փաշինյանին։
Անահիտ Ավանեսյանը, վերցնելով տիկնոջ տվյալները, խոստացել է հետաքրքրվել խնդրով։
Հետևեք մեզ Viber-ում
