Իսրայելն Իրանի վրա ավելի քան 15 000 արկ է նետել հակամարտության սկզբից ի վեր

Իսրայելի պաշտպանության բանակը (ԻՊԲ) «Առյուծի մռնչյուն» գործողության մեկնարկից ի վեր մեկ ամսից էլ պակաս ժամանակահատվածում Իրանի վրա ավելի քան 15 000 արկ է նետել: «Արմենպրես»-ի փոխանցմամբ՝ այս մասին հայտնել է Իսրայելի պաշտպանության նախարար Իսրայել Կացը։

«ԻՊԲ-ն ավելի քան 15 000 զինամթերք է նետել Իրանի վրա. սա քառակի ավելի է, քան «Ժողովուրդն ինչպես առյուծ» գործողության ժամանակ», – Կացի խոսքերն է մեջբերում իսրայելական 12-րդ ալիքը։

ԱՄՆ-ն և Իսրայելն Իրանի դեմ համատեղ ռազմական գործողություն են սկսել փետրվարի 28-ից՝ մեղադրելով Թեհրանին հրթիռային և միջուկային ծրագիրը զարգացնելու համար։ Իրանը հերքել է մեղադրանքները և սկսել է պատասխան հարվածներ հասցնել Իսրայելին, ինչպես նաև տարածաշրջանի երկրներում ամերիկյան ռազմաբազաներին։

«Ժողովուրդն ինչպես առյուծ» իսրայելական գործողությունն իրականացվել է 2025 թ. հունիսին, որի նպատակը եղել է Իրանի միջուկային օբյեկտների և ռազմական ենթակառուցվածքների ոչնչացումը։ Հակամարտությունից 12 օր անց երկու կողմերը հայտարարեցին փոխադարձ հրադադարի մասին։