Հայաստանը 2500 եվրո կվճարի Ալեքսանդր Արզումանյանին.ՄԻԵԴ-ն է պարտավորեցնում

 «Արզումանյանն ընդդեմ Հայաստանի» գործով վճռով ՄԻԵԴ-ը  պարտավորեցրել է Հայաստանի իշխանություններին 2500 եվրո վճարել հայցվորին, որից 2000-ը՝ որպես ոչ նյութական վնասի փոխհատուցում, և 500-ը՝ որպես փոխհատուցում ծախսերի համար: Այդ մասին հայտնում է ՄԻԵԴ-ի կայքը: Մարդու իրավունքների և հիմնարար ազատությունների պաշտպանության մասին կոնվենցիայի 34-րդ հոդվածի հիման վրա ՀՀ նախկին արտգործնախարար Ալեքսանդր Արզումանյանը 2007 թվականի դեկտեմբերի 29-ին   ներկայացրել է Հայաստանի Հանրապետության դեմ բողոքը ,որը վերաբերում է փողերի լվացման գործով Ալեքսանդր Արզումանյանին՝ որպես նախկին արտգործնախարար և «Քաղաքացիական անհնազանդություն» քաղաքական շարժման առաջնորդի, կալանքի տակ պահելու հանգամանքին: Հիշեցնենք,որ Արզումանյանը ձերբակալվել է 2007 թվականի մայիսին և կալանավորվել: Դատարանը նրան կալանավորելու որոշում է կայացրել հանցանքի ծանրության և իրավապահներից թաքնվելու, արդարադատությանը խոչընդոտելու և կրկնահանցագործության վտանգի հիման վրա: Նրա կալանքը պարբերաբար երկարաձգվել է համանման հիմքերով՝ չնայած Արզումանյանի առարկություններին։ Նա ազատ է արձակվել նույն տարվա սեպտեմբերին՝ հանրապետությունից չհեռանալու մասին ստորագրությամբ: Ալեքսանդր Արզումանյանը ՄԻԵԴ-ում բողոքել է, որ դատարանը բավարար կերպով չի արդարացրել նրա կալանքի անհրաժեշտությունը և խախտվել են ազատության և անձնական անձեռնմխելիության, ինչպես նաև ողջամիտ ժամկետում դատաքննության իրավունքները: Հայցվորը պահանջել է 81.250 եվրո՝ որպես ոչ նյութական վնասի փոխհատուցում: