41-ամյա վարորդը Mercedes-ով 120մ գլխիվայր շրջվելով` հայտնվել է դաշտում. կան վիրավորներ

Այսօր` մարտի 3-ին, խոշոր ավտովթար է տեղի ունեցել Արագածոտնի մարզում: Ժամը 17:00-ի սահմաններում 41-ամյա Օնիկ Խուդոյանը Աշտարակ-Էջմիածին ավտոճանապարհին` Սասունիկ գյուղի վարչական տարածքում, իր վարած Mercedes E200 մակնիշի 35 VՍ 526 համարանիշի ավտոմեքենայով դուրս է եկել ճանապարհի հանդիպակաց երթևեկելի գոտի և մոտ 120մ մի քանի պտույտ գլխվիվայր շրջվելով` հայտնվել դաշտամիջյան հատվածում: Ինչպես դեպքի վայրից հայտնում է ֆոտոլրագորղ Գագիկ Շամշյանը, վթարի վայր է ժամանել ոստիկանության Աշտարակի բաժնի օպերատիվ խումբը` Աշտարակի ոստիկանապետ Արմեն Մելոյանի գլխավորությամբ: Ժամանել է նաև Աշտարակի հրշեջ-փրկարարական ջոկատը` 1 մարտական հաշվարկով: Օպերատիվորեն ժամանել են նաև Ճանապարհային ոստիկանության 2-րդ սպայական գումարտակի 2-րդ վաշտի 1-ին դասակի աշխատակիցները` վաշտի հրամանատար Գագիկ Վարդանյանի և դասակի հրամանատար Արմեն Պողոսյանի գլխավորությամբ: Վթարի վայրում հավաքվածները ասում էին, որ վարորդին և 2 ուղևորներին ավտոմեքենայից դուրս են բերել քաղաքացիները և նրանք հիվանդանոց են տեղափոխվել վաշտի հրամանատար Գ. Վարդանյանի ուղեկցությամբ: Վթարի մասին ՃՈ օպերատիվ կառավարման կենտրոնից տեղեկությունը փոխանցել են Հայաստանի քննչական կոմիտեի Արագածոտնի մարզային քննչական վարչություն, որտեղից ժամանել է քննչական խումբը` վարչության պետ Մարատ Դուրյանի գլխավորությամբ: Տեղում քննչական աշխատանքները ղեկավարում է ավագ քննիչ Վահե Մարտիրոսյանը, ում կողմից փաստի առթիվ նյութեր են նախապատրաստվում: Ավագ քննիչի հանձնարարականով ավտոմեքենան վերամբարձ կռունկ-քարշակի միջոցով տեղափոխվում է ոստիկանության Աշտարակի բաժնի պահպանվող հատուկ տարածք: Ոստիկանությունն ու քննչական բաժինը պարզում են վիրավորների ինքնությունը: Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: