Թուրքիան վերահաստատում է Ղրիմի բռնակցում չճանաչելու վերաբերյալ դիրքորոշումը

Թուրքիայի արտաքին գործերի նախարարությունը հայտարարել է, որ շարունակում է չճանաչել Ռուսաստանի կողմից Ղրիմի բռնակցումը՝ այն համարելով միջազգային իրավունքի խախտում։ Այս մասին տեղեկացնում է ermenihaber.am-ը։

Գերատեսչության հայտարարությունում ընդգծվում է, որ 12 տարի առաջ Ղրիմի ինքնավար հանրապետության «հանրաքվեի» արդյունքում տեղի ունեցած բռնակցումը անօրինական է, և Թուրքիան կրկին հաստատում է, որ չի ընդունում այդ փաստացի իրավիճակը։

Միաժամանակ նշվում է, որ Թուրքիան շարունակելու է աջակցել Ուկրաինայի անկախությանը, ինքնիշխանությանը և տարածքային ամբողջականությանը, ինչպես նաև հետևել Ղրիմում զարգացումներին, հատկապես՝ Ղրիմի թաթարների իրավիճակին։

Իր հերթին Ղրիմի թաթարների ազգային մեջլիսը շնորհակալություն է հայտնել Թուրքիային՝ Ուկրաինայի տարածքային ամբողջականությանը աջակցելու և թաթարական համայնքի խնդիրներին ուշադրություն դարձնելու համար։