Մեկ անձ, մեկ քույր, միլիոնավոր դրամներ. 76 միլիոն դրամ՝ Ժաննա Անդրեասյանի քրոջ տնօրինած ՍՊԸ-ին
Երևանի Մխիթար Հերացու անվան բժշկական համալսարանն իր հերթական խոշոր գնումն է կատարել «Ար․Մեդտեխնիկա» ՍՊԸ-ից։
Էլեկտրոնային գնումների armeps համակարգում օրերս հանրայնացված պայմանագրից տեղեկանում ենք, որ այս ՍՊԸ-ն ոչ մրցակցային մեկ անձ գնման ընթացակարգով ստանձնել է «Հերացի» թիվ 1 հիվանդանոցային համալիրի աշխատանքների կազմակերպման նպատակով՝ պահեստամասերի փոխարինմամբ GE CT Revolution EVO մոդելի համակարգչային տոմոգրաֆիկ համալիրի և GE Allia IGS 540 մոդելի անգիոգրաֆիկ համակարգի տարեկան սպասարկման ծառայությունների մատուցման պարտավորությունը։
Պայմանագրի գին է նշվում 75 մլն 988.800 դրամը։
168․am-ն անդրադարձել է «Ար․Մեդտեխնիկա»-ին՝ մասնավորապես տեղեկացնելով, որ այս ՍՊԸ տնօրենը ԿԳՄՍ նախարար Ժաննա Անդրեասյանի քույրն է՝ Նունեն։
Իրավաբանական անձանց ռեգիստրի տվյալներով՝ ընկերությունը գործում է 2012 թվականից և հենց այդ թվականից ընկերության բաժնետեր է Վահրամ Թորոսյանը․ այսօր նրա բաժնեմասը 100 տոկոս է։
Ի դեպ, 2012 թվականից գործող ընկերությունը պետգնումներում հայտնվում է 2017 թվականից, բայց գերակտիվություն է ցուցաբերում հատկապես 2018 թվականից հետո՝ տարբեր ընթացակարգերով շուրջ հարյուրավոր խոշոր պայմանագիր կնքելով տարբեր պետական գերատեսչությունների հետ։
Ի դեպ, նախորդ տարեվերջին հրատապ մեկ անձ ընթացակարգով Առողջապահության նախարարությունը «Ար.մեդտեխնիկա» ՍՊԸ-ից շուրջ 105 միլիոն դրամի գնում էր կատարել հրատապ մեկ անձ ոչ մրցակցային եղանակով։
Այս գնման ընթացակարգով ՍՊԸ-ից գնումներ արվում են 2018 թվականից սկսած․ արդեն 5 գնում, որոնցից 4-ի դեպքում պատվիրատուն ԵՊԲՀ-ն է։
ԶԱՐՈՒՀԻ ԴԻԼԱՆՅԱՆ
Հետևեք մեզ Viber-ում
