Արմեն Բիլյանի ինքնազգացողությունը կտրուկ վատացել է

Ավան եւ Նոր Նորք վարչական շրջանների ընդհանուր իրավասության դատարանում դատավոր Մեսրոպ Մակյանի նախագահությամբ մեկնարկել է  «Սասնա ծռեր» խմբի գործով արտագնա դատական նիստը: «Սասնա ծռեր» խմբի անդամ Սմբատ Բարսեղյանի շահերի պաշտպան Հայկ Ալումյանը գրություն էր ուղարկել դատարան` տեղեկացնելով, որ մեկ այլ դատական նիստի է եւ միայն ժամը 14:00-ին կարող է ներկայանալ դատարան: Դատարանը որոշում կայացրեց նիստն ընդմիջել, մինչեւ պաշտպանի դատարան ներկայանալը: Արմեն Բիլյանի ինքնազգացողությունն այսօր հենց դատարանի դահլիճում վատացավ։ Նրա համար շտապօգնություն հրավիրվեց դատարան։ Դեկտեմբերի 21-ից հացադուլի մեջ գտնվող Արմեն Բիլյանը պահանջում է իրեն տեղափոխել «Արմավիր» ՔԿՀ և պատշաճ բուժօգնություն ցուցաբերել։ Նրա պաշտպան Արմինե Ֆանյանը, դատավոր Մեսրոպ Մակյանին տեղեկացրեց, որ իր պաշտպանյալի առողջական վիճակը ծայրահեղ ծանր է և նա մտադիր չէ դադարեցնել  հացադուլը, և  եթե նրա պահանջները չբավարարվեն՝ հանրավոր է անդառնալի հետևանքներ առաջանան։ Ի պատասխան դատավոր Մեսրոպ Մակյանն ասաց, որ նախորդ նիստին գրություն էր ուղարկել ՔԿՎ՝ նշելով, որ եթե անհրաժեշտ է դատարանի թույլտվությունը, ապա խնդրել է տեղյակ պահել այդ մասին, որպեսզի դատարանը կողմնորոշվի: Դատարանը ստացել է ՀՀ ԱՆ ՔԿՎ պետի առաջին տեղակալի կողմից ուղարկված գրությունը, համաձայն որի՝ Բիլյանի մոտ ախտորոշվել է հարմարվողականության խանգարում, լրացուցիչ հետազոտությունների կարիք չկա, գտնվում է բժիշկների հսկողության տակ: