«Իրանի սիրիացում չի նախատեսվում». իրանագետներ

«Հայելի» մամուլի ակումբի այսօրվա ասուլիսում իրանագետներ Տիգրան Դավթյանը և Ռուբիկ Մինասյանն անդրադարձան Իրանում առկա իրավիճակին՝ նշելով, որ ցույցերի պատճառները տարաբնույթ են՝ սոցիալական խնդիրներից մինչև քաղաքական խնդիրներ, այդուամենայնիվ, «միջազգային կամ իրանցի ոչ մի փորձա­գետ Իրանի սիրիացում չի նախատեսում, բայց որոշները ցանկություն ունեն, որ թու­նիզացում լինի, այսինքն՝ Իրանում էլ՝ ինչպես Թունիզում, պետք է կատարվեն որոշա­կի փոփոխություններ՝  թե՛ ներքին, թե՛ արտաքին քաղաքականություններում»: Նման կարծիք հայտնեց Տիգրան Դավթյանը: Բանախոսների խոսքով՝ նախագահ Ռոհանին քայլեր է ձեռնարկում, որ կառա­վարութ­յան լիազորությունները շատանան, քանի որ խնդիր կա կառավարության և հո­գևորա­կանության միջև: Թեհրանի ավագանին որոշում է կայացրել Թեհրանում մեծ հրա­պա­րակ կառուցել՝ ցույցեր անցկացնելու նպատակով: Իրանագետները նշեցին նաև, որ Իրանում՝ նախորդ տարիների համեմատութ­յամբ, զգալի է  դարձել դեմոկրատիան, այդ է վկայում խորհրդարանի երեք պատգա­մավորների պահանջը՝ ուղղված ոստիկաններին: Վերջիններս պետք է ներկայացնեն ցույցերի ժամանակ ձերբակալված անձանց ցուցակները և նրանց վիճակի մասին տեղեկություն: «Քառասունամյա  Իրանի համար անխուսափելի է դեմոկրատացումը, որին նա հասնելու է քայլ առ քայլ»,- եզրափակեց իրանագետ Ռուբիկ Մինասյանը: Քրիստինե Աղաբեկյան