Քուվեյթում ԱՄՆ դեսպանատունը դադարեցրել է աշխատանքը, Սաուդյան Արաբիայում կասեցվել են հյուպատոսական ծառայությունները

Քուվեյթում ԱՄՆ դեսպանատունը ժամանակավորապես դադարեցրել է աշխատանքը Մերձավոր Արևելքում ստեղծված բարդ իրադրության կապակցությամբ։ Այս մասին դիվանագիտական ներկայացուցչությունը հայտնել է X հարթակի իր էջում:

«Տարածաշրջանում շարունակվող լարված իրադրության պատճառով Քուվեյթում ԱՄՆ դեսպանատունը փակ կլինի մինչև հատուկ կարգադրություն։ Բոլոր պլանային և արտակարգ հյուպատոսական ընդունելությունները չեղարկվել են», – ասվում է հաղորդագրության մեջ։

Հրապարակման մեջ նշվում է, որ դեսպանատան աշխատանքի վերսկսման ժամանակի մասին կհաղորդվի լրացուցիչ։

Մարտի 1-ին Քուվեյթի քաղաքացիական նավահանգստում հանպատրաստից կառուցված օպերատիվ կենտրոնի վրա Իրանի ուղիղ հարվածի հետևանքով զոհվել են ամերիկացի զինծառայողներ։ ԱՄՆ զինված ուժերի կենտրոնական հրամանատարությունը հաղորդել է, որ իրանական հարվածներից զոհված ամերիկացի զինծառայողների թիվը հասել է վեցի։

Ինչպես հաղորդում է CNN-ը, Էր Ռիադում ԱՄՆ դեսպանատունն էլ դադարեցնում է հյուպատոսական ծառայությունների մատուցումն այն բանից հետո, երբ դիվանագիտական ​ներկայացուցչության վրա գրոհել է երկու անօդաչու թռչող սարք։

Զոհերի կամ տուժածների մասին տվյալներ չկան։

Սաուդյան Արաբիայի զինվորականներն ավելի վաղ տեղեկացրել էին, որ Էր Ռիադի և թագավորության կենտրոնական մասում գտնվող Ալ Խարջ քաղաքի մերձակայքում կալանել են ութ անօդաչու թռչող սարք։ Ավերածությունների կամ տուժածների մասին չի հաղորդվում։

Իսրայելը և ԱՄՆ-ն փետրվարի 28-ից հարվածներ են հասցնում Իրանին, որն էլ պատասխան հարվածներ է հասցնում Իսրայելին և տարածաշրջանի երկրներում գտնվող ամերիկյան ռազմաբազաներին և էներգետիկ օբյեկտներին։